Nizamnamə kapitalından ən yaxşı istifadə edən banklar hansılardır?

Azərbaycanda fəaliyyət göstərən 30 bank ötən il 279,4 milyon manat xalis mənfəət əldə edib ki, bu da onların bu il yanvarın 1-nə malik olduqları 4 520,126 milyon manat məbləğində nizamnamə kapitalının 6,2%-i qədərdir.

Ayrı-banklarda isə sözügedən nisbət fərqlidir. Belə ki, 2018-ci ildən mənfəətlə çıxmış 25 bank arasında nizamnamə kapitalından ən yaxşı istifadə edəni "Kapital Bank" ASC olub. Bu bankın əldə etdiyi mənfəət kapitalının 43,4%-ni təşkil edib. Baxmayaraq ki, "Kapital Bank" kapitalının məbləğinə görə, Azərbaycanda 5-ci bankdır.

Fəaliyyət effektivliyinə görə, 2-ci yeri "Azərbaycan Beynəlxalq Bankı" ASC (ABB) tutub. Bu bank ötən il nizamnamə kapitalının 34,3%-i qədər mənfəət əldə edib. Qeyd edək ki, ABB kapitalının məbləğinə görə, ölkədə liderdir.

3-cü yerə isə 30,8%-lik göstərici ilə "AFB Bank" ASC çıxıb. Xatırladaq ki, bu bank nizamnamə kapitalının məbləğinə görə, Azərbaycanda 17-cidir.

Mənfəətlə işləmiş qalan 22 bankdan 5-də sözügedən göstərici 10-25% arasında, 13 bankda 1-10% arasında, 4 bankda isə 0-1% arasında dəyişir.

№	Bankın adı	Bankın illik mənfəətinin / zərərinin nizamnamə kapitalına nisbəti
1	Kapital Bank	43,4%
2	Azərbaycan Beynəlxalq Bankı	34,3%
3	AFB Bank	30,8%
4	Unibank	24,1%
5	PAŞA Bank	23,1%
6	Premium Bank	15,4%
7	Xalq Bank	12,3%
8	Bank Avrasiya	10,4%
9	Yapı Kredi Bank Azərbaycan	9,7%
10	Naxçıvan Bank	8,0%
11	Azərbaycan Sənaye Bankı	6,6%
12	Bank of Baku	6,6%
13	AGBank	5,2%
14	Rabitəbank	3,1%
15	Bank Respublika	2,9%
16	İran Milli Bankı - Bakı	2,9%
17	Zıraat Bank Azərbaycan	2,8%
18	Günay Bank	2,0%
19	NBC Bank	1,8%
20	Muğan Bank	1,5%
21	Bank BTB	1,1%
22	Azər-Türk Bank	0,3%
23	Turan Bank	0,1%
24	Atabank	0,1%
25	Pakistan Milli Bankı - Bakı	0,0%
26	"Access Bank"	-11,1%
27	Express Bank	-17,3%
28	Amrah Bank	-31,5%
29	Nikoyl Bank	-38,9%
30	Bank VTB Azərbaycan	-79,3%