Dolaylı yollarla verilən pullar da çıxarılıb lazım olmayan işlərə sərf olunub.
Banco.az xəbər verir ki, maliyyə naziri Samir Şərifov Beynəlxalq Bankın borcları barədə "Hesabat"a danışıb. Ona görə ki, son zamanlar bu mövzu diqqəti yenidən çəkməyə başlayıb və onu da hiss etməmək mümkün deyil ki, mövzunu səxavətlə paylaşanların bel bağladığı puldan başqa qoxu gəlir…
Cənab nazir, Beynəlxalq Bankın borcu var idi. Bu məsələ necə oldu? Onların borcu 3 milyard hesabına ödəndi, yoxsa hələ ödənməyib?
- Beynəlxalq bankda dövlətin səhmləri var və üstünlük təşkil edir, daha doğrusu səhmlərin nəzarət zərfi dövlətə məxsusdur. Bildiyiniz kimi ölkə prezidentinin sərəncamına əsasən bu bankın sağlamlaşdırılması və özəlləşdirilməyə hazırlanması üçün tədbirlər görülür. Bu asan deyil. Çünki bankın sabiq mecenmenti, sabiq rəhbərliyi bir çox kobud səhvlərə yol vermişdi və bu gün bu səhvlərə külli qiymət də verilməkdədir. Bir çox hallarda müşahidə şurasının qərarlarına əməl edilməmiş, bu qərarlar pozulmuş və bank barədə məlumatlar təhrif olunmuşdur. Nəticə etibarı ilə bu bankda mənimsəmə halları müşahidə olunub. Biz bu gün bu bankın toksik (pis) aktivlərini, hansılar ki, kreditlər verilib, pullar oğurlanıb bunu açıq şəkildə etiraf etməliyəm, belə hallar da var. Əlaqəli şəxslərə dolaylı yollarla pullar verilib, o pullar da çıxarılıb lazım olmayan işlərə sərf olunub. Biz bu gün bu işlərlə məşğuluq. Borcluların pulları qaytarması işlərini davam etdiririk. Bu baxımdan hüquq-mühafizə orqanları ilə birlikdə - Daxili İşlər Nazirliyi və Baş Prokurirluqla işlər davam etdirilir. Çalışırıq ki, pul alan adamlar öz məsuliyyətlərini dərk edərək banka borclarını qaytarsınlar. Digər tərəfdən bank əmanətçilərinin, bank müştərilərinin fəaliyyətinə xələl gətirməməkdən ötrü – çünki bu böyük bir bankdır, sistemli bir bankdır, Azərbaycan bank sisteminin 40%-dən çoxu bu bankın üzərinə düşür – ona görə də biz dövlət tərəfindən qərara aldıq ki, bunların verdiyi müəyyən pis kreditləri aqrar üsulu ilə alırıq bu kreditlərin üzərinə, söhbət gedir müəyyən zavod, fabriklərdən, hansılar ki, səmərəsizdir və hal-hazırda pis işləyir, bunları biz sağlamlaşdırmaq yoluyla satıb, sonra əldə ediləcək pulları kreditin bərpa edilməsinə sərf edəcəyik. Bu pullar bu istiqamətlərə sərf olunur.
Təşəkkür edirəm ətraflı müsahibə üçün. Düşünürəm ki, sizin verdiyiniz cavablar bundan sonra insanların suallarının cavabı olacaq.
