Əgər hansı bir bank və ya onun təqdim etdiyi xidmət haqqında məlumat almağa təcili ehtiyac duyursansa, onda onlayn məsləhət xidməti haqqında danışmaq tam yerinə düşər. Bankların rəsmi saytlarında onlayn məsləhət xidmətinin mövcudluğu sizin suallarınıza cavab tapmağınıza olduqca kömək olacaqdır.

Gəlin razılaşaq ki, bu gün hamı öz suallarına kompüterin başında ayrılmadan cavab tapmaq istəyir və bu zaman onlar ya bankların sosial şəbəkələrdəki rəsmi səhifələrinə, ya bankların kosporativ saytlarına üz tuturlar. Belə ki, bankların “Qaynar xətləri” müştərilərin tələbatını qarşılaya bilmir. 

Onlayn məsləhət  - sual, problem, şikayətlərinizlə bağlı fikirlərinizi yönəldə biləcəyiniz bir sistemdir.Bu bankın məhsul və xidmətləri haqqında ümumi məlumat ala biləcəyiniz bir xidmət kanalıdır.  Bunu bir növ canlı dəstək kimi də qəbul eləmək olar. Bank nümayəndəsi sizi dinləyir (müraciətinizi oxuyur) və sizə doğru olan məlumatı çatdırır. Siz bunun üçün hər hansı bir məbləğ ödəmirsiniz, yerinizi dəyişmirsiniz və növbə üçün gözləməli olmursunuz. 

Lakin bəzən onlayn müraciətlər zamanı da hazırda heç bir operatorun sərbəst olmadığı deyilir və müraciətinizin cavablanması üçün bir az gözləməyiniz xahiş olunur. Lakin call-center xidməti ilə müqayisədə bu müddət daha az olur.

Onlayn məsləhətdən yararlanmaq üçün, Siz sadəcə bankın saytında müvafiq pəncərədə adınızı, soyadınızı və əksər hallarda e-mail adresinizi qeyd edirsiniz. Bu isə sadəcə yaxşı bir xidmət göstərmək üçün tələb olunur.

Xidmətdən yararlanmaq üçün hər hansı bir proqramdan istifadəyə də ehtiyac yoxdur. Günün bəlli saatlarında, bankların iş rejiminə uyğun olaraq, bu xidmət hər kəsə açıq olur.

Hal-hazırda Azərbaycanda bir sıra banklar bu xidməti müştərilərə təqdim edir. Müxtəlif versiyalarda olsalar da onların hamısı eyni məqsədə xidmət edir:  Müştərinin rahatlığı və məmnuniyyəti.

Soltanova Könül & Günel Abduraxmanova/Banco.az