Müəllif: Şəbnəm İbrahimxəlilova ,Banco.az

“Pepsi”, “Lay’s” və “Gatorade” kimi brendlərin sahibi “PepsiCo” üçüncü rübdə analitiklərin gözləntilərindən daha yaxşı nəticə göstərib.

Şirkətin gəliri 5,6% artaraq 25,27 milyard dollara çatıb. Buna baxmayaraq, “PepsiCo” il üzrə mənfəət gözləntisini aşağı salıb.

Şirkətin əsas problemi Şimali Amerika bazarıdır. Burada istehlakçıların qəlyanaltı və içkilərə tələbi əvvəlki qədər güclü deyil. Üçüncü rübdə içki satışlarının həcmi 2% azalıb, qəlyanaltı satışlarında isə ciddi artım qeydə alınmayıb.

“PepsiCo” tələbi artırmaq üçün bəzi məhsulların qiymətlərini aşağı salır və yeni məhsulların təqdimatına daha çox vəsait ayırır. Lakin xammal və istehsal xərclərinin artması şirkətin qazancına təzyiq göstərir.

Bu səbəbdən şirkət 2026-cı il üçün mənfəət artımı ilə bağlı gözləntisini 5–7%-dən 2,5–3,5%-ə endirib. Yəni şirkət əvvəlkindən daha çox qazanacağını gözləsə də, mənfəətin artımının daha zəif olacağını düşünür.

Şirkətin beynəlxalq bazarlardakı vəziyyəti isə daha yaxşıdır. Asiya-Sakit okean regionu və Latın Amerikasında həm içki, həm də qəlyanaltı satışları artır.

Demək olar ki, şirkət gözləniləndən çox gəlir əldə edib. Amma Şimali Amerikada satışların zəifləməsi və xərclərin artması gələcək qazanc üçün narahatlıq yaradır. Şirkət indi əsas diqqəti ABŞ və Kanada bazarındakı vəziyyəti yaxşılaşdırmağa yönəldir.