Müəllif: Tamara Mustafayeva, Banco.az
Ceff Bezosun “Blue Origin” şirkəti gələn həftə yeni kosmik missiyaya hazırlaşır.
Banco.az xəbər verir ki, amerikalı milyarder iş adamı Ceff Bezos tərəfindən təsis edilən aviasiya və kosmik uçuş xidmətləri şirkəti “Blue Origin” 2022-ci ilin sentyabrındakı uğursuz cəhddən sonra gələn həftə yenidən kosmos missiyasını həyata keçirəcək.
Xatırladaq ki, “Blue Origin” şirkəti özünün “New Shepard” suborbital raketinin kosmik kapsulunun fəaliyyətini 15 aydan çox müddətə dayandırmışdı. İndi isə şirkət dekabrın 18-də ekipajsız bir missiya həyata keçirəcəyini açıqlayıb.
Federal Aviasiya Administrasiyası (FAA) qəza ilə bağlı təhqiqatını sentyabr ayında rəsmi olaraq yekunlaşdırmış və “Blue Origin”ə mühərrikin və onun bəzi komponentlərinin yenidən dizaynı və "təşkilati dəyişikliklər" daxil olmaqla 21 düzəlişin həyata keçirilməsini tapşırmışdı.
Odur ki, bu yeni buraxılış tarixi o deməkdir ki, “Blue Origin” bütün tədbirləri həyata keçirib və FAA-dan dəyişdirilmiş buraxılış lisenziyası alıb.
Bizi sosial şəbəkələrdən izləyin!!
