Müəllif: Tamara Mustafayeva, Banco.az
Türkiyə və Avropa İttifaqı 6 ildən sonra yüksək səviyyəli iqtisadi görüş keçirəcək.
Banco.az xəbər verir ki, Türkiyə-Avropa İttifaqı (Aİ) Yüksək Səviyyəli İqtisadi Dialoq (High Level Economic Dialogue - HLED) İclası 6 ildən sonra sabah Brüsseldə keçiriləcək.
Xəzinə və Maliyyə Nazirliyindən əldə edilən məlumata görə, Türkiyə ilə Aİ arasında dialoq kanallarının gücləndirilməsi məqsədilə 29 noyabr 2015-ci ildə keçirilən Türkiyə-Aİ Zirvəsində HLED mexanizminin yaradılması qərara alınıb. Bu çərçivədə indiyədək 2016, 2017 və 2019-cu illərdə üç görüş baş tutub. Birinci və üçüncü görüşlərə Türkiyə, ikinci görüşə isə Belçika ev sahibliyi edib.
Son olaraq, 2024-cü ilin dekabr ayında Aİ Ümumi İşlər Şurasının iclasında dialoqun yenidən canlandırılması qərara alınıb. Bu qərar Aİ Dövlət və Hökumət Başçıları Zirvəsində də təsdiqlənərək rəsmi müstəviyə daşınıb.
Bu çərçivədə yeni dövrün ilk iclası 3 aprel tarixində Brüsseldə keçiriləcək.
Açılış nitqlərini Türkiyənin Xəzinə və Maliyyə naziri Mehmet Şimşek, Aİ-nin İqtisadiyyat və Səmərəlilik üzrə komissarı Valdis Dombrovskis və Aİ-nin Genişlənməyə cavabdeh komissarı Marta Kos edəcək.
İclas tərəflər arasında iqtisadi münasibətlərin sürətləndirilməsi və strateji əməkdaşlığın dərinləşdirilməsi baxımından mühüm əhəmiyyət kəsb edir.
Bizi sosial şəbəkələrdən izləyin!!
