Müəllif - Eldar Kərimov/Banco.az
Türkiyə 2024-cü ilin dekabrında 7,364 milyard kubmetr qaz idxal edib. Bu, 2023-cü ilin dekabrı ilə müqayisədə 21% çoxdur və ölkənin qaz sənayesi tarixində yeni rekord göstəricidir.
Bu barədə Beynəlxalq Enerji Agentliyinin (IEA) aylıq hesabatında məlumat verilib. IEA hesabatı Türkiyə Enerji Bazarını Tənzimləmə Şurasının (EPDK) icmalından bir neçə gün əvvəl dərc olunur.
Rusiyadan Türkiyəyə qaz tədarükü dekabrda 34% artaraq 2,835 milyard kubmetrə çatıb, bu isə 2020-ci ilin dekabrında qeydə alınmış 2,949 milyard kubmetrlik rekord göstəriciyə yaxın bir rəqəmdir. "Qazprom" 2024-cü ildə Türkiyəyə 21,374 milyard kubmetr qaz ixrac edib, bu isə 2023-cü illə (21,34 milyard kubmetr) demək olar ki, eynidir.
Azərbaycan dekabrda Türkiyəyə 1,037 milyard kubmetr qaz tədarük edib (bu göstərici sentyabr ayında əldə olunmuş orta gündəlik səviyyəyə yaxındır). 2023-cü ilin dekabrında bu rəqəm 962 milyon kubmetr idi. 2024-cü il üzrə ümumi ixrac 11,478 milyard kubmetr təşkil edib.
İranın qaz ixracı dekabrda 552 milyon kubmetrə enib (2023-cü ilin dekabrında 781 milyon kubmetr idi). 2024-cü il üzrə ümumi ixrac isə 7,043 milyard kubmetr təşkil edib.
LNG tədarükü isə ümumilikdə 2,939 milyard kubmetr olub və bu da yeni rekorddur. IEA konkret LNG tədarükçülərini açıqlamasa da, məlumdur ki, Türkiyə uzunmüddətli müqavilə çərçivəsində Əlcəzairdən LNG alır. Bundan əlavə, ABŞ Energetika Nazirliyi böyük həcmlərdə LNG tədarük etdiyini bildirmişdi.
Türkiyə enerji sektorunda qaz istifadəsini artırır və idxalını yüksəldir, xüsusən də qış mövsümündə hidroenerji istehsalının azalması səbəbindən.
EPIAS milli enerji birjasının operativ məlumatlarına görə, Türkiyə yanvar və fevral aylarında da yüksək qaz idxalı səviyyəsini qoruyur. Bunun üçün bütün tədarükçülərdən maksimum qaz axınını təmin edir. Bundan əlavə, ölkə yeraltı qaz anbarlarındakı (PXA) ehtiyatlarını aktiv şəkildə istifadə edir, bu isə yayda əlavə qaz idxalına ehtiyac yaradacaq.
