Müəllif: Tamara Mustafayeva, Banco.az
"Myspace"in məşhur funksiyası artıq "Instagram"da aktivləşdiriləcək.
Banco.az xəbər verir ki, "Instagram" istifadəçilərə profillərinə mahnı əlavə etməyə imkan verən yeni funksiyanı elan edib.
2000-ci illərin əvvəllərində məşhur olan "Myspace" platformasını xatırladan bu yeniliklə istifadəçilər öz profillərinə mahnı əlavə edə biləcəklər. Bununla belə, "Myspace"dən fərqli olaraq, mahnılar avtomatik oxunmayacaq, istifadəçilər profilə daxil olduqda mahnını oxuda və dayandıra biləcəklər.
"Instagram" tərəfindən paylaşılan skrinşotlara görə, əlavə edilən mahnılar istifadəçi profillərinin bio hissəsində görünəcək. İstifadəçilər onları silənə və ya dəyişdirənə qədər mahnılar profildə qalacaq.
Mahnı əlavə etmək istəyən istifadəçilər “profili redaktə et” səhifəsinə daxil olaraq "Instagram"ın lisenziyalı musiqi kitabxanasından mahnı axtarıb seçə biləcəklər. Seçilmiş mahnının 30 saniyəlik hissəsi profil musiqisi kimi təyin edilə bilər.
"Instagram" yeni funksiyaları ilə istifadəçilərə profillərini daha şəxsi etməyə imkan verməklə yanaşı, platformanı daha interaktiv etməyi hədəfləyir.
Bizi sosial şəbəkələrdən izləyin!!
