Azərbaycan Mərkəzi Bankının pul siyasəti qərarlarının ictimaiyyətə açıqlanması qrafikinə əsasən Bankın İdarə heyətinin növbəti iclası 19 iyun 2020-ci il tarixində keçiriləcək və faiz dəhlizinin parametrlərinə dair qərar da həmin gün açıqlanacaqdır.
Bu dəfə də faizlərin sabit saxlanılacağına daha çox ehtimal verilir.
Hazırda 3%-ə yaxın olan inflyasiya Mərkəzi Bankın 4-6% olan hədəf aralığından aşağıdır. Buna baxmayaraq koronovirusun geniş yayılması ilə qeyri-müəyyənlik davam edir. Apreldə kəskin ucuzlaşmış neft May və İyunda bir qədər bahalaşıb. İnflyasiyanın Mərkəzi Bankın hədəf aralığında aşağı olmasına, neft qiymətlərinin bir qədər yüksəlməsinə və Manatın məzənnəsinə yuxarı istiqamətdə təzyiqin azalmasına baxmayaraq 19 İyunda da Mərkəzi Bank gözləmə mövqeyi tuta bilər.
SON 2 İCLASDA UÇOT FAİZ DƏRƏCƏSİ DƏYŞMƏZ SAXLANILIB
2020-ci ildə Mərkəzi Bankın İdarə Heyətinin artıq 3 dəfə iclası keçirilib.
31 Yanvar 2020-ci il tarixində keçirilmiş iclasda Mərkəzi Bankın İdarə Heyəti uçot dərəcəsinin 25 baza bəndi azaldılaraq 7.5%-dən 7.25%-ə endirilməsi haqqında qərar qəbul etmişdi. Faiz dəhlizinin yuxarı və aşağı hədləri uçot dərəcəsinə ±1.75%-lik diapazonda müəyyənləşdirilmişdi (9% və 5.5%).
19 mart 2020-ci il tarixində keçirilmiş iclasda isə Mərkəzi Bankın İdarə Heyəti uçot dərəcəsinin 7.25% səviyyəsində dəyişməz saxlanılması haqqında qərar qəbul etmişdi. Faiz dəhlizinin yuxarı həddi 9% saxlanılmaqla aşağı həddi 6.75%-ə qaldırılmışdı. Mərkəzi Bank inflyasiya risklərinə görə uçot dərəcəsini dəyişməz saxlamışdı.
1 May 2020-ci il tarixində isə Mərkəzi Bankın İdarə Heyəti uçot dərəcəsinin 7.25% və faiz dəhlizinin aşağı həddinin 6.75% səviyyəsində dəyişməz saxlanılması haqqında qərar qəbul etmişdir. Faiz dəhlizinin yuxarı həddi isə 9%-dən 8%-ə endirilmişdir.
"Proqnozlara görə, bu ilin sonunadək çox cüzi bir resessiya olacaq"
Bunu İyunun 17-də Prezident İlham Əliyevlə Dünya Bankının yeni vitse-prezidenti və digər nümayəndələri arasında videokonfrans zamanı Mərkəzi Bankın sədri Elman Rüstəmov bildirib.
Mərkəzi Bankın sədri çıxışında bildirib ki, Azərbaycan bu böhranla əlaqədar çağırışlarla - xüsusilə əsas ixrac etdiyi məhsulların qiymətlərinin düşməsi ilə bağlı çağırışlarla üzləşmişdir:
"Lakin biz makroiqtisadi sabitliyi qoruya bilmişik, inflyasiyanın səviyyəsi təqribən 3 faizdir. Milli valyutanın kursu sabitdir və mübadilə kursu üzərində heç bir təzyiq yoxdur. Proqnozlara görə, bu ilin sonunadək çox cüzi bir resessiya olacaq. Lakin maliyyə sektorunda vəziyyət çox sabitdir və həmçinin bəzi qeyri-sabit bankların sistemdən çıxarılmasına nail olmuşuq. Həmçinin cənab Prezident, qorunan əmanətlərin sığortalanması üzrə qanunun müddəti artırılmışdır və maliyyə sektorunda sabitliyin qorunması üzrə bütün addımlar atılacaq".
marja
Bizi sosial şəbəkələrdən izləyin!!
