Müəllif - Fərid İslamov - Banco.az

Böyük Britaniyada fevral ayında istehlak qiymətləri illik ifadədə 2,8% artıb, bunu ölkənin Milli Statistika İdarəsi (ONS) məlumat verib.

Beləliklə, inflyasiya yanvardakı 3%-dən aşağı düşüb.

Trading Economics tərəfindən sorğulanan analitiklər orta hesabla keçən ay qiymətlərin 2,9% artacağını proqnozlaşdırırdılar.

Ərzaq məhsulları və alkoqolsuz içkilər 3,3% bahalaşıb (yanvarda da eyni səviyyədə), alkoqol və tütün məhsulları 5,7% bahalaşıb (yanvarda 4,9%), mebel və ev əşyaları isə cəmi 0,2% bahalaşıb (yanvarda 0,5%). Bununla yanaşı, geyim və ayaqqabı qiymətləri 0,6% azalıb (yanvarda 1,8% artım qeydə alınmışdı).

Restoranlar və otellərdə qiymətlər 3,4% artıb (yanvarda 3,3%). Rabitə xidmətləri isə 7,3% bahalaşıb (yanvarda 5,9%), təhsil xidmətləri 7,5% artıb (yanvarda da eyni səviyyədə), tibb xidmətləri isə 5,1% bahalaşıb (yanvarda 5%). Nəqliyyat xidmətləri qiymətləri isə 1,8% artıb (yanvarda 1,7%).

Fevral ayında Böyük Britaniyada istehlak qiymətləri əvvəlki ayla müqayisədə 0,4% artıb, halbuki yanvarda 0,1% azalma qeydə alınmışdı.