"Bu gün Azərbaycanda tətbiq olunan məzənnə bazardakı tələb və təklifdən asılı olaraq formalaşır".
Bunu "Fitch" beynəlxalq reytinq agentliyinin Bakıda keçirilən illik konfransında Azərbaycan Mərkəzi Bankının Monetar siyasət departamentinin direktoru Azər Ələsgərov deyib.
Onun sözlərinə görə, 2017-ci ilin yanvar ayına qədər banklar xarici valyutanı istədiyi məzənə ilə sata bilməzdilər: "2017-ci ilin yanvarında dörd faizlik marja aradan qaldırıldı. O vaxtdan etibarən banklar xarici valyutanı istədiyi məzənə ilə satırlar. Fikri verirsinizsə, banklar xarici valyutanı rəsmi məzənnəyə daha yaxın məzənnə ilə satırlar. Bu da o deməkdir ki, bu məzənnə bazarın müəyyən etdiyi məzənnədir. Valyuta bazarının statistikasına baxsanız, görərsiniz ki, valyuta bazarı özünütənzimləmə rejimində işləyir. Bütün dünya ölkələrində olduğu kimi Azərbaycanda da Mərkəzi Bank valyuta bazarındakı proseslərə təsir göstərir. Çünki, məzənnə pul siyasətinin vacib transmissiya kanallarından biridir. Buna görə biz pul siyasətinə dair qərarlar qəbul edərkən bunun məzənnəyə necə təsir edə biləcəyini nəzərə alırıq. Yaradılmış monetar şərait valyuta bazarında da vəziyyəti stabilləşdirib. 2017-ci ilin əvvəllərində pul kütləsinin azaldılması valyuta bazarında vəziyyəti stabilləşdirib. Tədiyyə balansındakı profisit valyuta bazarına müsbət təsir etdikcə, monetar şərait də tədricən yumşalıb. 2017-ci il ərzində manat və pul bazarı 8,7 faiz artıb. Tədiyyə balansındakı profisitin 2018-ci ildə də davam edəcəyini gözləyirik. Makro-iqtisadi şərait imkan verir ki, valyuta bazarında qeyri-stabillik yaratmadan pul siyasətini yumşaldaq. İlin qalan dövründə inflyasiya proqnozunun reallaşmasından asılı olaraq faiz dəhlizi parametrlərinin də azalma istiqamətində dəyişəcəyini məqbul hesab edirik".
Apa.az
