Müəllif:Mehin Qasımova,Banco.az

ABŞ və Çin nümayəndə heyətləri Malayziyada qarşılıqlı rüsum artımı nəticəsində yaranan ticarət gərginliyini yumşaltmaq məqsədilə keçirilən danışıqların yeni raundundan sonra ilkin çərçivə razılaşması əldə etdiklərini açıqlayıblar.

Banco.az xəbər verir ki, noyabrın 10-da müddəti başa çatan müvəqqəti sazişin yenilənməsi və nadir torpaq elementləri məsələsi danışıqlarda önə çıxsa da, danışıqlar oktyabrın 30-da Tramp-Xi görüşünə hazırlıq rolunu oynayıb.

Kuala Lumpurda mətbuat konfransında çıxış edən Çinin Beynəlxalq Ticarət Nümayəndəsi Li Çinqanq, iki ölkənin nümayəndə heyətlərinin danışıqlar nəticəsində tariflərlə bağlı “ilkin razılığa” gəldiyini və çərçivə razılaşmasının hər iki ölkənin daxili təsdiq proseslərinə təqdim ediləcəyini bildirib.

ABŞ Ticarət Nümayəndəsi Jamieson Greer verdiyi açıqlamada, tərəflərin dünən axşam və bu gün səhər intensiv danışıqlardan sonra iki ölkə liderlərinə təqdim olunacaq çərçivə razılaşması üzərində razılaşdıqlarını bildirib.

Noyabrın 10-da müddəti başa çatacaq müvəqqəti tarif razılaşmasının yenilənməsi və nadir torpaq elementləri ilə bağlı məsələlərin də görüşlər zamanı müzakirə edildiyini bildirən Greer, konstruktiv danışıqlar prosesi apardıqlarını və liderlərin məhsuldar görüşlər keçirə biləcəkləri bir mərhələyə gəldiklərini bildirib.