Müəllif:Ayşən İmanova/Banco.az
“Alibaba Group Holding”in qurucusu Cek Ma şirkəti bazar qüvvələrinə və innovasiyalara inanmağa çağıraraq, sənayedəki rəqabətin onu daha da gücləndirəcəyini qeyd edib.
Banco.az xəbər verir ki, bu barədə o, “Alibaba”nın 25 illiyinə həsr olunmuş əməkdaşlarına müraciətində yazıb.
"Alibaba”nın bir çox biznesi çətinliklərlə üzləşir və rəqiblərin onları keçməsi ehtimalı var. Bu gözləniləndir, çünki heç bir şirkət əbədi olaraq hər hansı bir sənayenin zirvəsində qala bilməz”, - o yazıb.
Qeyd edək ki, Çinin e-ticarət sənayesində əsas oyunçu olan “Alibaba”nın biznes artımı Çində aktivliyin zəifləməsi, eləcə də istehlakçı əhval-ruhiyyəsinin pisləşməsi fonunda yavaşlayır. “Pinduoduo” (“PDD Holdings”ə məxsusdur) və “Douyin” (“ByteDance”a məxsusdur) kimi platformalar da daxil olmaqla artan rəqabət də “Alibaba”nın biznes inkişaf sürətini məhdudlaşdırır.
Cek Ma, şirkətin əvvəlki kimi ən azı 102 il sağ qalacağını gözlədiyini qeyd edərək, işçiləri problemlər və rəqabət qarşısında təslim olmamağa çağırıb.
Xatırladaq ki, Cek Ma 23,6 milyard dollar sərvəti ilə “Forbes”in ən zəngin iş adamları siyahısında 83-cü yerdədir.
Bizi sosial şəbəkələrdən izləyin!!
