Müəllif - Fərid İslamov - Banco.az
Neft qiymətləri əvvəlki ticarət zamanı əldə edilən artımı itirib və hazırda enişlə ticarət olunur.
Moskva vaxtı ilə 18:29-da Londonda ICE Futures birjasında Brent markalı neftin may fyuçersləri bir barreli 72,97 dollar səviyyəsində olub ki, bu da 0,03 dollar (0,04%) azalma deməkdir. NYMEX birjasında WTI markalı neftin may fyuçersləri isə həmin vaxt 0,11 dollar (0,16%) azalaraq bir barreli 69 dollar səviyyəsində olub.
Panmure Liberum analitikləri qeyd edirlər ki, ABŞ-ın son tarif tədbirləri neft qiymətlərinə dəstək versə də, OPEC+ təşkilatının may ayında neft hasilatını artırmağa davam edəcəyinə dair məlumatlar qiymət artımını məhdudlaşdırıb.
Əvvəlki gün ABŞ Prezidenti Donald Tramp bəyan etmişdi ki, Vaşinqton Venesueladan neft və ya qaz alan ölkələrdən idxala 25% gömrük rüsumu tətbiq edəcək.
Həmin gün ABŞ Maliyyə Nazirliyi Chevron Corp.-a Venesuela neftinin hasilatı və ixracı üçün verilən lisenziyanın müddətinin 27 may tarixinə qədər uzadıldığını elan edib.
