Müəllif:Mehin Qasımova,Banco.az
Çin milli futbol komandası Dünya Kubokuna vəsiqə qazana bilməsə də, ölkə turnirdən böyük iqtisadi gəlir əldə edib.
Banco.az xəbər verir ki, "South China Morning Post"un (SCMP) məlumatına görə, Dünya Kuboku zamanı dünyanın müxtəlif ölkələrindən gələn sifarişlər Çin şirkətlərinin ixracını artırıb. Xüsusilə məşhur komandaların və futbolçuların formalarına tələbat yüksək olub.
Çinin Jiangxi əyalətində fəaliyyət göstərən ixracatçı Zheng Ziyi bildirib ki, Argentina millisinin uğurlu çıxışından sonra bu komandanın formalarına sifarişlər kəskin artıb. Onun sözlərinə görə, son aylarda forma satışları təxminən 60 faiz yüksəlib.
Çin Gömrük Administrasiyasının məlumatına əsasən, ölkənin idman malları ixracı ilin ilk yarısında 67,53 milyard yuana çatıb. Çin hazırda qlobal idman malları ixracının 40 faizdən çoxunu təmin edərək bu sahədə lider mövqeyini qoruyur.
Turnir Çin brendləri üçün də beynəlxalq tanıtım imkanı yaradıb. Hisense və Mengniu kimi şirkətlər Dünya Kuboku zamanı stadion reklamları vasitəsilə milyonlarla tamaşaçıya çatıb. Bildirilir ki, turnir dövründə "Mengniu" brendi üzrə internet axtarışları kəskin artıb.
Mütəxəssislərin hesablamalarına görə, Dünya Kuboku dövründə Çin formalar, idman ləvazimatları, lisenziyalı məhsullar, reklam və sponsorluq fəaliyyətləri hesabına təxminən 8–12 milyard dollar əlavə gəlir əldə edib.
Beləliklə, Çin milli komandası Dünya Kubokunda iştirak etməsə də, istehsal və ixrac gücü sayəsində turnirin ən böyük iqtisadi qazananlarından biri olub.
