Müəllif:Mehin Qasımova,Banco.az

Dünyanın ən kiçik respublikası olan Nauru müstəmləkə keçmişindən uzaqlaşmaq və yerli kimliyini gücləndirmək məqsədilə rəsmi adını "Naoero" olaraq dəyişdirməyə hazırlaşır.

Banco.az xəbər verir ki, Mikroneziya ada dövlətinin prezidenti David Adeang parlamentdə çıxış edərək, dəyişikliyin millətin irsinə, dilinə və kimliyinə hörmətin daha güclü ifadəsi olduğunu vurğulayıb.

Parlament tərəfindən etirazsız təsdiqlənən təklif, təxminən 13 min əhalisi olan adada qüvvəyə minməzdən əvvəl ictimai səsverməyə çıxarılacaq.

Hökumətin bəyanatında qeyd olunur ki, "Naoero" ölkənin Nauru dilində yerli adıdır, "Nauru" adı isə keçmişdə xaricilərin yerli tələffüzdən asanlıqla istifadə edə bilməsi üçün qəbul edilib.

Rəsmi səsvermə prosesi hələ başa çatmasa da, ölkədəki poçt xidmətlərinin, milli səhiyyə sisteminin və müxtəlif dövlət qurumlarının artıq "Naoero" adından istifadə etməyə başladığı bildirilir.

Digər tərəfdən, Avstraliya Ali Komissiyasının da məlumat mətnlərində həm "Nauru", həm də "Naoero" adlarını birlikdə istifadə etdiyi bildirilir.