Maliyyə Nazirliyi dövlət istiqrazlarına tələbin təklifdən dəfələrlə yüksək olması nəticəsində faizlərin aşağı düşməsini müsbət hal kimi qiymətləndirir.
Bunu Azərbaycanın Maliyyə naziri Samir Şərifov AzTV-də yayımlanan “Günün Nəbzi” verilişində deyib.
“Maliyyə Nazirliyinin istiqrazları Azərbaycanda vacib alətdir. Ona görə ki, pulun dəyərini müəyyənləşdirən alətdir. İki həftə əvvəl bizim buraxdığımız istiqrazlara tələb yerləşdirilən məbləği 5 dəfə üstələmişdir. Nəticədə 2 illik istiqrazların gəlirliliyi 7% səviyyəsində qərarlaşmışdır. 18 İyun 2019-cu il tarixində Bakı Fond Birjasında keçirilmiş hərracda 1 illik dövlət istiqrazının faiz dərəcəsi 6,6% səviyyəsinə enmişdir. Bunlar kifayət qədər müsbət hallardır. Bu onu gösətərir ki, pul kütləsi olsa da faiz dərəcələri tədricən azalmaqda davam edir. Biz bunu müsbət faktor kimi qiymətləndiririk”,- nazir bildirib.
8 iyun 2019-cu il tarixində “Bakı Fond Birjası” QSC-də Maliyyə Nazirliyinin AZ0104006744 ISIN kodlu, tədavül müddəti 364 gün olan 25 milyon manat məbləğində dövlət istiqrazları üzrə hərrac keçirilib. İnvestorlar tərəfindən təqdim edilən sifarişlərin nominal üzrə ümumi məbləği 117 milyon manat təşkil edib.
Maliyyə Nazirliyi tərəfindən 25 milyon manat məbləğində dövlət istiqrazların rəqabətli sifarişlər üzrə orta ölçülmüş qiyməti 93.8119 (gəlirlilik 6.6326%) səviyyəsində müəyyən edilib.
İstiqrazların ödəmə müddəti 16 iyun 2020-ci ildir.
Marja
