Müəllif - Fərid İslamov - Banco.az

 Böyük Britaniyanın bankları avtomobil kreditləşdirməsində pozuntularla bağlı müştərilərə 8,2 milyard funt sterlinq ($11 mlrd) kompensasiya ödəməli olacaqlar. Bu barədə Maliyyə Bazarlarında Davranış Qaydalarına Nəzarət İdarəsi (Financial Conduct Authority, FCA) məlumat verib.

Kompensasiya proqramının işə salınması və həyata keçirilməsi maliyyə institutlarına əlavə təxminən 2,8 milyard funt başa gələcək. Beləliklə, onların ümumi xərcləri 11 milyard funt sterlinqə çatacaq, FCA bildirib. Daha əvvəl tənzimləyici bu məbləği 9-18 milyard funt aralığında qiymətləndirirdi.

Cari ilin avqust ayında Böyük Britaniyanın Ali Məhkəməsi qərar çıxarıb ki, banklar müştərilərə yalnız ən ciddi hallarda qeyri-etik kreditləşdirmə zamanı kompensasiya ödəməlidirlər.

İş bankların avtomobil dilerlərinə ödədiyi komissiyaları əhatə edirdi. FCA bu komissiyaları 2021-ci ildə qadağan edib və 2024-cü ildə keçmiş müqavilələri yoxlamağa başlayıb.

FCA gözləyir ki, istehlakçılar orta hesabla 700 funt kompensasiya alacaqlar. Daha əvvəl bu məbləğ 950 funt səviyyəsində proqnozlaşdırılırdı.