Musiqi ruhun qidasıdır. Notların birləşməsindən yaranan bu möcüzəvi səs bəzən insana rahatlıq versə də, bəzən də əsəblərinə təsir edə bilər. Ona görə də şirkətlər musiqi seçimlərinə hər zaman xüsusi diqqətlə yanaşırlar.

Banco.az olaraq sizlərə banklara zəng edən zaman müştərilərin ilk qarşılaşdıqları musiqilərdən söz açacağıq. Hər birimiz banka zəng edən zaman gözləmə rejimində az da olsa olmuşuq. Bu zaman səslənən melodiya kimin yadındadır?

Adətən çağrı mərkəzlərində standart olaraq klassiklərin əsərlərindən bir parça ifa olunur. Bu da çox vaxt telefonun öz avtomatik rejimində olan səslərdən biri olur. Lakin bəzi diqqətli şirkətlər var ki, fon rejimində ifa olunacaq melodiyanın da seçiminə fikir verirlər.  

Siz aşağıdakı siyahıda banklara zəng edən zaman müştərilərin fon rejimində eşitdikləri musiqilərlə tanış ola bilərsiniz. 

Araşdırmamızdan məlum olmuşdur ki, AGBank, Azər Türk Bank, Bank of Baku, Bank Silk Way, Expressbank, NBC Bank, Rabitəbank, Unibank Azərbaycan bəstəkarlarının əsərlərinə müraciət edib. 

AccessBank, Amrahbank, Atabank, Bank Respublika, Beynəlxalq Bank, Dəmirbank, Gunay Bank, Kapital Bank, Paşa Bank, VTB Bank, Yapı Kredi Bank Azərbaycan isə xarici bəstəkarlara müraciət etmişdir. 

Muğanbank-a zəng zamanı isə fon rejimində bankın istiqraz məhsulunun reklam mətni səslənir. 

AFB Bank, ASB Bank, Bank Avrasiya, Turanbank-da isə səslənən musiqi avtomatik rejimin öz musiqisidir. 

Banklar arasında Bank BTB, CDB Bank, Nikoil Bank, Xalq Bank-da fon rejimində heç bir musiqi səslənmir.