Müəllif:Mehin Qasımova,Banco.az

Alman avtomobil istehsalçısı "Porsche" daha geniş biznes optimallaşdırma planının bir hissəsi olaraq iş yerlərinin ixtisarını planlaşdırır.

Banco.az xəbər verir ki, şirkətin baş direktoru Maykl Leyters bildirib ki, "Porsche" rəhbərliyi işçilərin sayının tənzimlənməsi ilə yanaşı, istehsal sahələrinin rəqabət qabiliyyətini təmin etməyə yönəlmiş digər təşəbbüsləri də nəzərdən keçirməklə bağlı işçi nümayəndələri ilə danışıqlar aparır.

O, çərşənbə axşamı "Porsche" şirkətinin səhmdarlarının illik yığıncağında bildirib ki, danışıqlar  davam edir və ixtisarlar barədə əlavə məlumat hazırda verilə bilməz.

Leiters daha əvvəl elektrikli nəqliyyat vasitələrinin tətbiqinin yavaş tempinə, Çin bazarının zəifliyinə və ABŞ tariflərinə cavab olaraq avtomobil istehsalçısının əməliyyatlarını sadələşdirmək və mənfəətini artırmaq üçün strategiyasını yenidən nəzərdən keçirmək planını açıqlayıb.

Şirkət artıq bəzi aktivlərini satmağa başlayıb, o cümlədən "Bugatti" lüks idman avtomobili brendinə sahib olan "Bugatti Rimac" birgə müəssisəsindəki payını satıb. May ayında "Porsche"  batareya biznesi də daxil olmaqla, bir neçə əsas olmayan biznesin bağlandığını elan edib.

"Porsche" oktyabr ayında keçiriləcək investor tədbirində 2035-ci ilə qədər olan dövr üçün tam strategiyasını təqdim etməyi planlaşdırır.

Şirkət bu il əməliyyatların restrukturizasiyası ilə bağlı birdəfəlik xərclərin 800-900 milyon avro təşkil edəcəyini gözləyir.

Çərşənbə axşamı keçirilən ticarət əməliyyatları zamanı "Porsche" şirkətinin imtiyazlı səhmləri 1,5% dəyər itirib.