Asiya İnkişaf Bakının (AİB) prezidenti “Mərkəzi Asiya Regional İqtisadi Əməkdaşlıq (CAREC) Proqramı ölkələrində regional əməkdaşlıq üçün maliyyə texnologiyaları” layihəsinə 750 min ABŞ dolları ekvivalentini aşmayan texniki yardımın təqdim edilməsini təsdiqləyib.
Layihə ABD-nin Xüsusi texniki yardım fondunun maliyyə vəsaiti ilə qrant əsasında maliyyələşdiriləcək (350 min ABŞ dolları TASF 7-nin xüsusi fondundan, 400 min ABŞ dolları TASF15-in digər mənbələrindən ayrılacaq).
Texniki yardım layihəsi 2021-ci ilin oktyabr ayından 2023-cü ilin dekabr ayınadək 27 aylıq müddəti əhatə edəcək. Layihənin icrası dövründə, təxminən, 27 beynəlxalq adam-ay və 36 milli adam-ay konsultasiya xidməti göstəriləcək.
Texniki yardım vəsaiti hesabına CAREC-ə üzv ölkələrin maliyyə texnologiyaları sahəsində əldə olunmuş tərəqqi haqqında tədqiqatlar və köməkçi informasiya məhsulları hazırlanacaq.
Tədqiqatlarda maliyyə texnologiyaları ilə əlaqəli transsərhəd ödəmələr və hesablaşmalar, maliyyə tənzimləməsi və nəzarətinin inkişaf etdirilməsi, həmçinin özəl sektorun inkişafı, regional inteqrasiya və əməkdaşlıq kimi məsələlər işıqlandırılıb. Real aktivlərin rəqəmsallaşdırması və tokenizasiyası sahəsində nailiyyətlər, kapital və innovasiyalar bazarının inkişafı baxımından regional əməkdaşlıq sahəsində irəliləyiş baxımından Maliyyə texnologiyalarının potensial rolu müəyyən ediləcək.
CAREC regionunda maliyyə texnologiyalarının sürətli tərəqqisi üçün yol xəritəsinin hazırlanması planlaşdırılır. Bu yol xəritəsi çərçivəsində Ekspert biliklərinin gələcək inkişafı və regional səviyyədə maliyyə sektorunda innovasiyaların stimullaşdırılması üçün regionda maliyyə innovasiyaları mərkəzinin yaradılması imkanı qiymətləndiriləcək. Yol xəritəsinin hazırlanmasında AİB, CAREC İnstitutu, həmçinin maliyyə texnologiyaları ilə məşğul olan dövlət və özəl tərəfdaş təşkilatlar arasında əməkdaşlıq və informasiya mübadiləsi həyata keçiriləcək. Yol xəritəsində, maliyyə mənbələrinə çıxış baxımından ciddi məhdudiyyətlərlə üzləşən yerli icmalara, o cümlədən qadın sahibkarlara və borcalanlara xüsusi fayda vermək üçün maliyyə texnologiyalarından istifadə etməklə regionda maliyyə xidmətlərinə çıxışın genişləndirilməsi üzrə təkliflər yer alacaq.
Xatırladaq ki, CAREC proqramı regional əməkdaşlıq vasitəsilə iqtisadi artıma və dayanıqlı inkişafa dəstək məqsədilə 11 ölkənin (Azərbaycan, Əfqanıstan, Çin, Gürcüstan, Qırğız Respublikası, Monqolustan, Pakistan, Tacikistan, Türkmənistan və Özbəkistan) tərəfdaşlığını əks etdirir.
2021-ci ildə CAREC-ə Azərbaycan sədrlik edir.
report
Bizi sosial şəbəkələrdən izləyin!!
