Müəllif:Mehin Qasımova,Banco.az 

Alimlər Yer kürəsində həyatın nə qədər davam edə biləcəyi ilə bağlı yeni elmi hesablamalar təqdim ediblər.

Banco.az xəbər verir ki, tədqiqatların nəticələrinə görə, biosferin hazırkı forması əvvəllər təxmin ediləndən daha uzun, təxminən 1,8 milyard il davam edə bilər .

JGR Atmosphers elmi jurnalında dərc olunmuş bir araşdırmada bitkilərin və Yer kürəsindəki fotosintez prosesinin əvvəlki nəzəriyyələrin irəli sürdüyündən daha sabit olduğu aşkar edilib. Bu o deməkdir ki, həyatın təməli olan ekosistemlər milyardlarla il bundan sonra da fəaliyyət göstərə bilər.

Alimlər deyirlər ki, Günəş təbii təkamül prosesinin bir hissəsi olaraq tədricən daha parlaq və daha isti hala gəlib. Bu gün o, 4,5 milyard il əvvəlkindən təxminən üçdə bir çox enerji yayır. Mütəxəssis hesablamalarına görə, Günəş təxminən 5 milyard il daha qızmağa davam edəcək və bundan sonra həyat dövrünün növbəti mərhələsinə qədəm qoyacaq.

Maraqlıdır ki, 1982-ci ildə Britaniyalı alim Ceyms Lovelok fotosintezə əsaslanan həyatın Yer kürəsində yalnız 100 milyon il daha qalacağını proqnozlaşdırmışdı . Lakin yeni tədqiqat bu dövrü təxminən 18 dəfə uzadaraq 1,8 milyard il olduğunu təxmin edir.

Lakin bütün alimlər bu ssenarinin baş verəcəyinə inanmırlar. Astrobioloq Yakob Haqq-Misranın sözlərinə görə,  insan  fəaliyyəti nəticəsində atmosferə buraxılan istixana qazları qlobal istiləşməni sürətləndirə və biosfer üçün daha tez təhlükə yarada bilər.

Mütəxəssislər bildirirlər ki, qlobal iqlim dəyişikliyi hazırkı sürətlə davam edərsə, 6-7 min il ərzində Yer kürəsindəki təbii mühit ciddi təhlükə altında qalacaq .

Fotosintez Yer kürəsində həyatın əsasını təşkil edir. Əgər temperatur həddindən artıq yüksək səviyyələrə çatarsa, bu proses dayanacaq. Nəticədə bitkilər öləcək, qida zənciri pozulacaq və həyat indiki formada mövcud olmağa son qoyacaq.

Lakin elmi ictimaiyyət Yer kürəsinin taleyinin təkcə təbii kosmik proseslərlə deyil, həm də bəşəriyyətin iqlimə münasibəti ilə birbaşa əlaqəli olduğunu vurğulayır.