Müəllif: Tamara Mustafayeva, Banco.az
Avropa İttifaqı (Aİ) Rusiyaya qarşı hazırlanan yeni sanksiyalar paketi çərçivəsində alüminium idxalını qadağan etməyi planlaşdırır.
Banco.az xəbər verir ki, Avropa mətbuatında çıxan məlumatlara görə, Aİ ölkələri 24 fevral tarixində üçüncü ilinə girəcək Rusiya-Ukrayna müharibəsi səbəbindən Rusiyaya qarşı 16-cı sanksiya paketinin detallarını müzakirə etməyə başlayıblar.
Bu çərçivədə, Aİ Komissiyası üzv ölkələrə Rusiyadan alüminium idxalının qadağan edilməsini də əhatə edən bir paket təqdim edəcək.
Digər tərəfdən, Aİ daha əvvəl alüminiumun tel, boru və folqa formasında idxalını qadağan etmiş, lakin ilkin alüminium idxalını davam etdirmişdi.
Bundan əlavə, Aİ-yə üzv olan 10 ölkə Rusiyadan qaz və mayeləşdirilmiş təbii qaz (LNG) idxalının ən qısa zamanda qadağan edilməsini tələb edir.
Çexiya, Danimarka, Estoniya, Finlandiya, İrlandiya, Latviya, Litva, Polşa, Rumıniya və İsveç Rusiyanın Avropaya yanacaq ixracının qarşısının alınmasını və Rusiyanın LNG tankerlərinin limanlara girişinə qadağa qoyulmasını tələb edirlər.
Rusiyadan dəniz yolu ilə neft idxalını qadağan edən Aİ hələlik Rusiyadan qazla bağlı məhdudlaşdırıcı tədbir qərarı qəbul etməyib.
16-cı sanksiya paketi çərçivəsində Rusiya neftini daşıyan bütün gəmilərə məhdudiyyət tətbiq olunması və beynəlxalq ödəniş sistemi SWIFT-ə bəzi məhdudiyyətlərin qoyulması da müzakirə edilən tədbirlər arasındadır.
Digər tərəfdən, yeni sanksiyaların təsdiqlənməsi üçün Aİ ölkələrinin yekdil qərarı tələb olunur.
Xatırladaq ki, Aİ müharibə səbəbindən bu günə qədər Rusiyaya qarşı 15 sanksiya paketini həyata keçirib.
Bizi sosial şəbəkələrdən izləyin!!
