İtaliyanın Udine Ticarət Palatasının nümayəndələrinin Azərbaycan Respublikası Sahibkarlar (İşəgötürənlər) Təşkilatları Milli Konfederasiyasındakı görüşündə 2 ölkənin sahibkarlıq təşkilatları arasındakı mövcud iqtisadi əlaqələr müzakirə olunub.
Ölkəmizdə uğurla həyata keçirilən sosial-iqtisadi islahatlar nəticəsində Azərbaycanda sahibkarlıq fəaliyyətinin genişləndiyini qonaqların diqqətinə çatdıran Sahibkarlar Konfederasiyasının prezidenti M.Musayev bildirib ki, ölkəmizdə əlverişli biznes və investisiya mühiti hökm sürür. Azərbaycanın artıq investisiya ixrac edən ölkəyə çevrildiyini qeyd edən M.Musayev son illər İtaliya şirkətlərinin ölkəmizə olan marağını da yüksək qiymətləndirib. İtaliya şirkətlərinin Azərbaycan bazarında xüsusi çəkiyə malik olduğu da istisna olunmayıb. İki ölkə sahibkarlarının qarşılıqlı əməkdaşlığı üçün Sahibkarlar Konfederasiyasının lazımı dəstək verəcəyi vəd olunub. Konfederasiyanın nəzdində “ASK Biznes Konsaltinq” MMC-nin artıq fəaliyyətə başlaması və bu qurumun xarici şirkətlərin ölkəmizdə qeydiyyatdan keçməsinə və digər məsələlərin həllinə köməklik edəcəyi qonaqların nəzərinə çatdırılıb.
“ASK Biznes Konsaltinq” MMC-nin fəaliyyətə başlamasını maraqla qarşılayan İtaliyanın Udine Ticarət Palatasının prezidenti dr.Pozzonı palatanın yerləşdiyi bölgə haqqında ətraflı məlumat verib. Triest vilayətinin əlverişli liman şəhəri olduğunu, bölgədə 1 mln.200 min insanın məskunlaşdığını, sözügedən ərazidə 1000 –dək şirkətin fəaliyyət göstərdiyini tədbir iştirakçıları ilə bölüşüb. Dr. Pozzo həmçinin onu da bildirib ki, bu şirkətlər arasında beynəlxalq səviyyədə maraq doğuran brendlər də az deyil. Təsadüfi deyil ki, İtaliya şirkətləri içində Azərbaycanda tikinti sahəsində özünəməxsus payı olanlar da var. İtaliyanın Udine Ticarət Palatasının prezidenti hələlik Bakıda 9 şirkətlə təmsil olunduqlarını, lakin gələcəkdə bu siyahının daha da genişlənəcəyini bildirib. Qeyd edib ki,gələn ilin mart ayında ölkəmizə İtaliyalı iş adamlarından ibarət böyük bir nümayəndə heyətinin səfəri gözlənilir. Əsasən dizayn, tikinti, qida, sənaye,mebel və s. sektorlarda fəaliyyət göstərən italiyan sahibkarlar Azərbaycanda işgüzar əlaqələr yaratmaq niyyətindədirlər. Ölkəmizə təşrif gətirən nümayəndə heyətinin əsas məqsədi səfər çərçivəsində bir-sıra layihələrin təməlini qoymaq missiyasından ibarətdir.
Daha sonra Sahibkarlar Konfederasiyasının prezidenti qonaqları maraqlandıran suallara cavab verib.
