Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayevin Ukrayna Respublikası Ticarət-Sənaye Palatasının prezidenti Gennadi Çijikov ilə görüşündə qarşılıqlı maraq doğuran məsələlər müzakirə edilib.
ASK-nın prezidenti Məmməd Musayev belə təmas və əlaqələrin hər iki ölkənin iş adamları arasında əlaqələrə müsbət təsir edəcəyini bildirmiş, ukraynalı iş adamları ilə ölkəmizdə sahibkarlıq fəaliyyəti ilə məşğul olan şəxslər arasında biznes əlaqələrinin intensizləşməsinə konfederasiyanın dəstək verəcəyini vurğulayaraq Azərbaycan Sahibkarlar Konfederasiyası ilə Ukraynanın Azərbaycandakı səfirliyi arasında mövcud işgüzar əlaqələri yüksək dəyərləndirmişdir. İki ölkə arasındakı bu əlaqələri bundan sonra daha da zənginləşdirməyin zəruri olduğunu qeyd edib.
Ukrayna Respublikası Ticarət- Sənaye Palatasının prezidenti Gennadi Çijikov bildirib ki, Azərbaycan Sahibkarlar Konfederasiyası ilə əməkdaşlıq əlaqələrini inkişaf etdirməkdə maraqlıdır. Görüş zamanı kənd təsərrüfatı, ərzaq təhlükəsizliyi, İKT üzrə əməkdaşlıq perspektivləri, logistika mərkəzlərinin açılması ilə əlaqədar fikir mübadiləsi aparılıb. Cənab Çijikov qeyd edib ki, Ukrayna dünyada yumurta istehsalına görə 2-ci, buğda ixracatına 4-cü yerdədir. Dünyada ixrac olunan olunan günabaxan yağının 50 %-ni Ukrayna təmin edir.Qonaq onu da bildirib ki, cari ilin dekabr ayında Bakıda İqtisadiyyat və Sənaye Nazirliyinin dəstəyi və Azərbaycanda İxracın və İnvestisiyaların Təşviqi Fondunun, Azərbaycan Sahibkarlar Konfederasiyasının təşkilatçılığı ilə Ukrayna-Azərbaycan biznes forumunun təşkili planlaşdırılır. Qonaq bilavasitə yerli iş adamları ilə qarşılıqlı əlaqələr yaratmaqda maraqlı olduqlarını dilə gətirib.
Görüşdə Ukraynanın Azərbaycandakı Səfirliyinin iqtisadi məsələlər üzrə müşaviri Vladimir Sidyaçeko da iştirak edərək, gələcək əməkdaşlığın daha da canlandırılmasına öz tövhələrini verəcəklərini vurğulamışlar.
Görüşün sonunda hər iki tərəfin nümayəndələrinin iştirakı ilə yeni əməkdaşlıq müqaviləsinin imzalanması haqqında razılıq əldə olunub.
