Tamara Mustafayeva, Banco.az
Beynəlxalq turizm 2022-ci ilin ilk yeddi ayında pandemiyadan əvvəlki səviyyələrin 57 faizinə çatan reys sayı ilə bərpa səylərini davam etdirib. Bəs hansı bölgəyə səfərlər nə qədər artıb?
Banco.az xarici mətbuata istinadla xəbər verir ki, Ümumdünya Turizm Təşkilatının (ÜTT) Dünya Turizm Barometrinə görə, 2022-ci ilin yanvar-iyul aylarında beynəlxalq turist gəlişləri 2021-ci ilin eyni dövrü ilə müqayisədə təxminən üç dəfə olmaqla 172 faiz artıb.
Bu o deməkdir ki, turizm sənayesi pandemiyadan əvvəlki səviyyələrin demək olar ki, 60 faizini bərpa edib.
Stabil bərpa beynəlxalq səyahətə olan güclü tələbin, habelə səyahət məhdudiyyətlərinin yumşaldılması və ya götürülməsinin nəticəsi kimi görülür.
Hesabatın hazırlandığı 19 sentyabr 2022-ci il tarixinə olan məlumata görə, dünyanın 86 ölkəsində hazırda Covid-19 ilə bağlı heç bir məhdudiyyət yoxdur.
2021-ci ilin ilk yeddi ayı ərzində qeydə alınan 175 milyon turistlik göstərici ilə müqayisədə 2022-ci ilin eyni dövründə təxminən 474 milyon turist dünyanın müxtəlif yerlərinə səfər edib.
Bəs hansı bölgə pandemiya dövrünün səviyyəsinə nə dərəcədə yaxınlaşıb?
Yaxın Şərq
-24%
Yaxın Şərq 2022-ci ilin yanvar-iyul aylarında 2019-cu il səviyyəsinin 76 faizinə çatmaqla ən sürətli bərpanı göstərən bölgə olub.
Yaxın Şərqə beynəlxalq gəlişlər 2022-ci ilin yanvar-iyul aylarında hər il təxminən dörd dəfə olmaqla ümumilikdə 238 faiz artıb.
Səudiyyə Ərəbistanının həcc ziyarətindən sonra açıqladığı 121%-lik nəticə ilə birlikdə iyul ayında pandemiyadan əvvəlki səviyyə 3 faiz üstələnib.
Avropa
-26%
Avropa 2022-ci ilin yanvar-iyul aylarında ən sürətli bərpanı göstərən ikinci region olub, gələnlərin sayı 2019-cu ildəki səviyyənin 74 faizinə çatıb.
Bu dövr ərzində Avropaya 2021-ci ilin ilk yeddi ayı ilə müqayisədə təxminən üç dəfə çox beynəlxalq uçuşlar olub ki, bu da 190 faiz artım deməkdir.
Nəticələr güclü regiondaxili tələbat və ABŞ-dan gələn səyahətçilərlə dəstəklənib.
Regionda turist sayı, xüsusən, iyun-iyul ayları ərzində intensiv artıb. İyul ayında gələnlər 2019-cu il səviyyəsinin təxminən 85 faizinə çatıb.
Amerika
-35%
Amerika 2022-ci ilin yanvar-iyul aylarında 2021-ci illə müqayisədə 103 faiz artımla 2019-cu ilin səviyyəsinin 65 faizinə çatıb.
Afrika
-40%
Afrika 2022-ci ilin yanvar-iyul aylarında 2021-ci illə müqayisədə 171 faizlik güclü artımla 2019-cu il səviyyəsinin 60 faizinə çatıb.
Asiya və Sakit Okean
-86%
2022-ci ilin ilk yeddi ayında gələnlərin sayı iki dəfədən çox olmaqla 165 faiz artıb, lakin bəzi sərhədlər zəruri olmayan səyahətlər üçün bağlı olduğundan 2019-cu ilin səviyyəsindən 86 faiz geridə qalıb.
Bizi sosial şəbəkələrdən izləyin!!
