Müəllif:Ayşən İmanova/Banco.az
ABŞ prezidentliyinə namizəd Donald Tramp markalı İncillərin satışından təxminən 300 min dollar qazanıb.
Banco.az xəbər verir ki, bu barədə “NBC News” siyasətçinin maliyyə hesabatlarına istinadən məlumat yayıb.
Məlumata görə, respublikaçı Amerikada dini ruhu canlandırmaq və onu "yenidən möhtəşəm" etmək üçün Müqəddəs Həftədə martın sonlarında İncil satmağa başlayıb.
"The Greenwood Bible" adlı İncil onlayn olaraq 59,99 dollara satılır. Trampın imzaladığı nüsxə isə 1 000 dollara başa gəlir. “Bəli, bu, Prezident Trampın təsdiq etdiyi yeganə İncildir!”, - deyə bu versiyasını satan internet saytında deyilir.
İncildən əlavə, Tramp şəxsi qeydləri olan “Tramp-a məktublar” kolleksiyasının satışından təxminən 4,5 milyon dollar qazanıb. O həmçinin 1 milyon dollardan çox kriptovalyutaya sahibdir.
