Müəllif:Mehin Qasımova,Banco.az

ABŞ Prezidenti Donald Tramp çərşənbə günü sosial media hesabında etdiyi paylaşımda ABŞ-da faiz dərəcələrinin 1 faiz və ya daha aşağı səviyyədə olmalı olduğunu bildirib.

Banco.az xəbər verir ki, Tramp paylaşımında Federal Ehtiyat Sistemini (FED) ABŞ-da faiz dərəcələrini dərhal aşağı salmağa çağırıb. O, “ABŞ üçün faiz dərəcələrini indi aşağı salın!” – deyə yazıb.

ABŞ Prezidenti faiz dərəcələrinin yüksək olmasının ABŞ-ı digər dünya iqtisadiyyatları ilə müqayisədə rəqabət baxımından əlverişsiz vəziyyətə saldığını bildirib. Tramp bu vəziyyəti ölkənin ticarət kəsiri ilə əlaqələndirib.

“Biz dünyanın demək olar ki, hər bir ölkəsini kürəyimizdə daşıyırıq və bu, davam edə bilməz”, – deyə Tramp qeyd edib.

Siyasətçilərin inflyasiyanın öz-özünə azalacağı ilə bağlı inamını itirməsindən sonra çərşənbə günü 2023-cü ildən bəri ilk faiz artımı baş verib. Avqust ayı üzrə məlumatlarda ABŞ-da inflyasiyanın gözləniləndən daha yüksək artım göstərməsindən sonra FED-in faiz dərəcələrini artıracağı gözlənilirdi.

ABŞ-İran münaqişəsinin yeddinci ayından qaynaqlanan yüksək enerji qiymətləri və Trampın tarif siyasəti FED-in inflyasiya hədəfləri ilə bağlı qeyri-müəyyənlik yaradıb.

Tramp FED-in sələfi Cerom Paueli  faiz dərəcələrini aşağı salmaq üçün daha aqressiv addımlar atmamaqda dəfələrlə sərt şəkildə tənqid edib. O, həmçinin Federal Ehtiyat Sisteminə digər yollarla da təzyiq göstərib.

Tramp FED-in İdarə Heyətinin üzvü Lisa Cooku vəzifəsindən kənarlaşdırmağa çalışıb. Lakin bu təşəbbüs indiyədək Ali Məhkəmə tərəfindən bloklanıb.