2016-cı il 1 yanvar tarixinə Sahibkarlığa Kömək Mili Fonduna (SKMF) öhdəlik olaraq vaxtında qaytarılmalı, lakin qaytarılması təmin edilməyən vaxtı keçmiş kreditlərin məbləği 40 milyon 785,85 min manat təşkil etmişdirsə, 2017-ci il 1 yanvar tarixinə 34 mlyon 683,5 min manat və ya 85,0% artaraq 75 milyon 469,37 min manata çatıb. Bu isə Fondun həmin tarixə kredit portfelinin 7,2%-ni təşkil edir.
Bu barədə “Azərbaycan Respublikasının 2016-cı il dövlət büdcəsinin icrası haqqında” qanun layihəsinə və dövlət büdcəsinin icrasına dair illik hesabata Hesablama Palatasının verdiyi rəydə bildirilir.
Qaytarılması təmin edilməyən vaxtı keçmiş kredit vəsaitlərindən 70 484,25 min manatı və ya 93,4%-i lisenziyaları ləğv olunmuş banklara, 4 570,74 min manatı və ya 6,6%-i isə fəaliyyəti davam edən müvəkkil kredit təşkilatlarına aid olub.
2017-ci il 1 yanvar tarixinə Fondun müvəkkil kredit təşkilatlarında kredit vəsaitlərinin (kredit, faiz və cərimə məbləği) qalığı 1 045 283,45 min manat olduğu halda, bundan lisenziyaları ləğv olunmuş banklarda olan vəsait qalıqları 202 711,68 min manat, yəni 19,4% təşkil edib.
© Report
