Dünya bazarında neft qiymətləri azalıb. Buna səbəb investorların ABŞ və İran arasında Dohada keçirilə biləcək danışıqların perspektivlərini, eləcə də Yaxın Şərqdəki gərginliyin gələcək inkişafını qiymətləndirməsidir.

Brent markalı neftin bir bareli 1,03% ucuzlaşaraq 72,40 dollara, ABŞ-ın WTI markalı nefti isə 0,66% dəyər itirərək 70,32 dollara enib.

KCM Trade şirkətinin baş bazar analitiki Tim Uoter bildirib ki, bazarda müəyyən nikbinlik olsa da, investorlar hələ də ehtiyatlı davranırlar. Onun sözlərinə görə, Hörmüz boğazından neft daşımalarının tam normallaşdığına dair kifayət qədər sübut yoxdur.

Tərəflər arasında danışıqların baş tutub-tutmayacağı ilə bağlı qeyri-müəyyənlik bölgədə əldə olunmuş atəşkəsin kövrək olduğunu göstərir. Dörd ay davam edən qarşıdurma qlobal enerji bazarının əsas marşrutu sayılan Hörmüz boğazından neft daşınmasına mənfi təsir göstərib.

Bununla belə, dəniz nəqliyyatı məlumatlarına əsasən, Yaxın Şərq ölkələri son hücumlara baxmayaraq, Hörmüz boğazı vasitəsilə neft və mayeləşdirilmiş təbii qaz (LNG) ixracını davam etdirirlər.

Goldman Sachs analitikləri hesab edirlər ki, Fars körfəzindən neft axınının hazırkı templə bərpası davam edərsə, iyulun əvvəlində gündəlik daşınma həcmi müharibədən əvvəlki təxminən 23 milyon barel səviyyəsinə çata bilər. Məlumatlara görə, Hörmüz boğazında gəmiçilik trafiki ötən həftə son ayların ən yüksək səviyyəsinə yüksəlib.