Müəllif:Gülbəniz Hüseynli/Banco.az

Biznes dünyasında fərqli fəaliyyət modelləri mövcuddur və onlardan biri də B2C – yəni Business-to-Consumer modelidir. 

Bu model, şirkətlərin məhsul və ya xidmətlərini birbaşa fərdi istehlakçılara təqdim etdiyi bir biznes strategiyasıdır. Müasir dövrdə, xüsusilə rəqəmsal texnologiyaların inkişafı ilə B2C modeli daha da geniş yayılmış və müxtəlif sektorlar üçün mühüm bir rol oynayıb.

Banco.az bu məqalədə B2C modelinin mahiyyəti, xüsusiyyətləri və real həyatda tətbiq nümunələri ətraflı təqdim edir:

B2C-in əsas xüsusiyyətləri:

1. Məqsədli auditoriya: Şirkətlər fərdi istehlakçıları hədəf alır.

2. Satış prosesi: Məhsullar və xidmətlər pərakəndə formada satılır.

3. Münasibət: Şirkətlər istehlakçılarla yaxın əlaqələr qurmağa çalışır, müştəri məmnuniyyəti və təcrübəsinə önəm verilir.

4. Marketinq: Reklam, rəqəmsal marketinq və sosial media platformaları kimi vasitələrlə istehlakçılara birbaşa çatdırılır.

B2C modeli üçün effektiv marketinq strategiyaları müəssisələrin uğur qazanmasında vacib rol oynayır. Bu modeldə marketinqin əsas məqsədi fərdi müştəriləri cəlb etmək və onları alış-veriş etməyə təşviq etməkdir. Sosial media, e-poçt marketinqi, SEO və məzmun marketinqi kimi rəqəmsal marketinq alətləri B2C marketinqinin ən mühüm hissələrindən biridir

B2C modelinə onlayn ticarət platformaları kimi Amazon və eBay, ənənəvi mağazalar olaraq supermarketlər və geyim dükanları, rəqəmsal xidmətlərdən Netflix və Spotify, eləcə də mobil tətbiqlərdən Wolt və Bolt Food kimi yemək sifarişi xidmətləri nümunə göstərilə bilər. B2C modeli müasir iqtisadiyyatda geniş yayılıb və texnologiyanın inkişafı ilə daha çox rəqəmsallaşıb. B2C satışları üçün satış nöqtələrinin harada yerləşməsi, onların ərazi əlçatanlığı və rahatlığı vacibdir. Bu xüsusiyyət onlayn ticarət və çatdırılma xidmətlərinin inkişafı ilə tədricən silinir, lakin hələ də qüvvədə qalır.