Kapitalından ən yaxşı istifadə edən banklar

Azərbaycanda fəaliyyət göstərən 30 bank bu ilin I rübünü 123,9 milyon manat xalis mənfəətlə başa vurub ki, bu da onların bu il aprelin 1-nə malik olduqları 4 milyard 638 milyon 586 min manat məbləğində nizamnamə kapitalının 2,7%-i qədərdir.

Ayrı-banklarda isə sözügedən nisbət fərqlidir. Belə ki, yanvar-mart aylarından mənfəətlə çıxmış 21 bank arasında nizamnamə kapitalından ən yaxşı istifadə edəni "Kapital Bank" ASC olub. Bu bankın əldə etdiyi mənfəət kapitalının 21,1%-ni təşkil edib. Baxmayaraq ki, "Kapital Bank" kapitalının məbləğinə görə, Azərbaycanda 6-cı bankdır.

Fəaliyyət effektivliyinə görə, 2-ci yeri "PAŞA Bank" ASC tutub. Bank ötən rüb nizamnamə kapitalının 10,7%-i qədər mənfəət əldə edib. Xatırladaq ki, "PAŞA Bank" kapitalının məbləğinə görə, 30 bank arasında ölkədə 3-cüdür.

Mənfəətinin kapitalına nisbətinə görə 3-cü yerə isə 10,5%-lik göstərici ilə "Azərbaycan Beynəlxalq Bankı" ASC sahib olub. Baxmayaraq ki, bu bank nizamnamə kapitalının məbləğinə görə, ölkədə liderdir.

Mənfəətlə işləyən qalan 18 bankdan 8-də sözügedən göstərici 1-10% arasında, 2 bankda 1%, 8 bankda isə 0-1% arasında dəyişir.

№	Bankın adı	Bankın rüblük mənfəətinin / zərərinin nizamnamə kapitalına nisbəti
1	Kapital Bank	21,1%
2	PAŞA Bank	10,7%
3	Azərbaycan Beynəlxalq Bankı	10,5%
4	Unibank	5,4%
5	Azərbaycan Sənaye Bankı	5,3%
6	Xalq Bank	3,2%
7	Rabitəbank	3,2%
8	Yapı Kredi Bank Azərbaycan	3,0%
9	Premium Bank	2,9%
10	Zıraat Bank Azərbaycan	1,9%
11	Naxçıvan Bank	1,6%
12	Bank Respublika	1,0%
13	Express Bank	1,0%
14	Nikoyl Bank	0,9%
15	Azər-Türk Bank	0,8%
16	Günay Bank	0,6%
17	Bank VTB Azərbaycan	0,5%
18	AFB Bank	0,2%
19	Turan Bank	0,2%
20	Atabank	0,1%
21	Bank Avrasiya	0,0%
22	AGBank	-0,5%
23	NBC Bank	-0,9%
24	Pakistan Milli Bankı - Bakı	-1,2%
25	Bank BTB	-4,0%
26	Amrah Bank	-4,3%
27	İran Milli Bankı - Bakı	-11,7%
28	Muğan Bank	-14,0%
29	Bank of Baku	-14,7%
30	Access Bank	-28,8%