ABŞ və İran arasında sülh sazişi və strateji əhəmiyyət daşıyan Hörmüz boğazının yenidən açılması ilə bağlı danışıqların dayandırılması ehtimalı neft qiymətlərinə təzyiq göstərərək çərşənbə axşamı bazarda yüksəlişə səbəb olub.

Banco.az xəbər verir ki, Brent markalı neftin fyuçersləri bir barel üçün 88 dollara yüksəlib. ABŞ-ın Qərbi Texas (WTI) markalı nefti isə 82,45 dollara çataraq iyulun 31-dən bəri ən yüksək səviyyəsini yeniləyib. Hər iki neft müqaviləsi əvvəlki sessiyada təxminən 5% bahalaşmışdı.

Qiymət artımında ABŞ prezidenti Donald Trampın İranın sülh sazişinin şərtlərinə cavab olaraq Tehrandan müharibələr, hücumlar və etirazlar zamanı həlak olanlarla bağlı təzminat tələb etməsi barədə açıqlamaları da rol oynayıb.

Bazar iştirakçıları hesab edirlər ki, tərəflər arasında artan fikir ayrılıqları Hörmüz boğazının yenidən açılması ilə bağlı danışıqları daha da çətinləşdirə bilər. Dünyanın mühüm neft daşınma marşrutlarından biri olan boğaz ətrafında qeyri-müəyyənliyin artması enerji təchizatı ilə bağlı narahatlıqları gücləndirir.

Digər tərəfdən, qlobal inflyasiya ilə bağlı qeyri-müəyyənlik Asiya bazarlarında da ehtiyatlı ticarət mühitinin formalaşmasına səbəb olub.

Neft bazarında investorların diqqəti bundan sonra ABŞ-ın iqtisadi göstəricilərinə və Vaşinqton-Tehran münasibətlərindəki yeni inkişaflara yönələcək.