Estée Lauder Tom Ford markasını 2,8 milyard dollara almağı planlaşdırır.

Banco.az xəbər verir ki, Gucci və Balenciaga-nın sahibi olan Kering Corporation da moda evini alacağını iddia olunurdu, lakin FT-nin məlumatına görə, danışıqlar dalana dirənib. Müqavilə gələn həftə rəsmən elan edilə bilər.

Amerikalı kosmetika və ətir istehsalçısı Estée Lauder, Tom Ford brendini 2,8 milyard dollara almaq üçün danışıqlar aparır, Financial Times mənbələrə istinadən yazır. Qəzetin məlumatına görə, sövdələşmə rəsmi olaraq bazar ertəsi, noyabrın 14-də elan edilə bilər.

Qəzet yazır ki, sövdələşmə baş tutsa, Estée Lauder üçün bu alış şirkətin tarixində ən böyük alış olacaq. Nəşr xatırladır ki, o, artıq Tom Fordla kosmetika və parfümeriya üçün lisenziya müqaviləsinə malikdir.
Noyabrın əvvəlində The Wall Street Journal Fransanın Kering SA şirkətinin (Balenciaga, Bottega Veneta, Gucci, Alexander McQueen və Yves Saint Laurent brendlərinin sahibi) Tom Fordu almaq istədiyini yazmışdı. Lakin FT-nin məlumatına görə, tərəflər razılığa gələ bilməyib və danışıqlar nəticəsiz qalıb.

Estée Lauder MAC, Clinique, Bobbi Brown, Jo Malone, Origins, DKNY brendlərinin sahibidir. Şirkət Tom Fordun alınmasını müzakirə etdiyini, WSJ-a avqust ayında cavabında yazmışdı. Həmin vaxt şirkətin bazar kapitallaşması təxminən 97,59 milyard dollar təşkil edirdi.

Şirkətlər uzun müddətdir əməkdaşlıq edir, xüsusən 2006-cı ildə Tom Ford Beauty adlı kosmetik məhsulların birgə istehsalına başlanılıb.