Müəllif:Mehin Qasımova,Banco.az
"Enerji qiymətlərinin artması ümumi inflyasiyanı daha da artıracaq".
Banco.az xəbər verir ki, bu sözləri Fed sədri Cerom Pauel deyib.
O bildirib ki, Yaxın Şərqdə baş verən hadisələrin ABŞ iqtisadiyyatına təsiri hələ də qeyri-müəyyən olaraq qalır.
Onun sözlərinə görə, enerji qiymətlərində artım qısa müddətdə inflyasiyanı yüksəldə bilər, lakin bunun iqtisadiyyata ümumi təsirinin miqyasını və müddətini qiymətləndirmək üçün hələ tezdir.
Federal Ehtiyat Sistemi-nin siyasət faiz dərəcəsini gözləntilərə uyğun olaraq 3,5–3,75 faiz səviyyəsində sabit saxlamasından sonra keçirilən mətbuat konfransında danışan Fed sədri mövcud pul siyasətinin maksimum məşğulluq və 2 faiz inflyasiya hədəflərinə doğru irəliləyişi dəstəklədiyini bildirib.
O qeyd edib ki, iqtisadi göstəricilər fəaliyyətin ümumilikdə möhkəm tempdə artdığını göstərir. İstehlak xərcləri sabit qalır, korporativ investisiyalar artır, lakin mənzil sektorunda zəiflik davam edir.
Pauel əlavə edib ki, əmək bazarında işsizlik səviyyəsi ötən ilin sonlarından bəri ciddi dəyişməyib, məşğulluq artımı isə nisbətən zəif olaraq qalır. Onun sözlərinə görə, bu, qismən immiqrasiyanın və işçi qüvvəsində iştirakın azalması ilə bağlıdır, eyni zamanda işçi qüvvəsinə tələbat da zəifləyib.
FED sədri inflyasiyanın hələ də 2 faizlik hədəfdən yüksək olduğunu vurğulayaraq bildirib ki, qiymət artımlarının əsas səbəblərindən biri tariflərin təsiri ilə mal sektorunda yaranan inflyasiyadır.
“Son həftələrdə inflyasiya gözləntilərinin qısamüddətli göstəriciləri artıb. Bu isə böyük ehtimalla Yaxın Şərqdə tədarükün pozulması fonunda neft qiymətlərinin yüksəlməsi ilə bağlıdır”, – deyə o qeyd edib.
Pauel həmçinin şəxsi mövqeyi ilə bağlı açıqlama verərək bildirib ki, Donald Tramp tərəfindən irəli sürülən namizəd Senatda təsdiqlənmədiyi halda belə, o, vəzifəsindən istefa verməyəcək və lazım gələrsə müvəqqəti olaraq vəzifəsini icra etməyə davam edəcək. O, bu yanaşmanın əvvəlki dövrlərdə də tətbiq olunduğunu vurğulayıb.
