Müəllif:Mehin Qasımova,Banco.az
Toyuq əti dünyada ən populyar ət növünə çevrilib.
Banco.az xəbər verir ki, Financial Times qəzetinin məlumatına görə, son illərdə artan tələbat istehsal həcmini kəskin şəkildə artırıb.
Nəşrin məlumatına görə, qlobal toyuq istehsalı 2006-2023-cü illər arasında əhəmiyyətli dərəcədə artıb. 2006-cı ildə dünyada təxminən 48,3 milyard toyuq olduğu halda, bu rəqəm 2023-cü ilə qədər 76,2 milyarda çatıb.
Toyuq ətinə tələbat xüsusilə Asiya-Sakit Okean regionunda, Amerikada və Avropada yüksəkdir. Nisbətən aşağı qiyməti, sürətli yetişdirilməsi və müxtəlif yeməklərdə çox yönlü olması onun populyarlığına kömək edir. FAO məlumatlarına görə, toyuq dünyada ən vacib quş növüdür və quş əti istehsalının əsas hissəsini təşkil edir.
Toyuq ətinin digər bir üstünlüyü ondan ibarətdir ki, müxtəlif hissələri ayrı-ayrı bazarlara yönəldilə bilər. Məsələn, Qərb ölkələrində istehlakçılar arasında o qədər də populyar olmayan toyuq ayaqları Çində yüksək tələbat olan məhsullardan biridir.
Mütəxəssislər əhali artımının, alıcılıq qabiliyyətinin artmasının və şəhərləşmənin gələcəkdə quşçuluq məhsullarına tələbatı daha da artıra biləcəyini bildirirlər. FAO həmçinin əhali artımının, gəlirlərin artmasının və şəhərləşmənin quşçuluq sektorunun inkişafına təkan verdiyini vurğulayır.
