Müəllif - Eldar Kərimov - Banco.az

 Avropanın ən böyük telekommunikasiya şirkəti "Deutsche Telekom AG" dördüncü rübdə xalis mənfəət əldə edib, il ərzində rekord səviyyədə dividend ödəyəcəyini elan edib və 2025-ci ildə 2 milyard avro dəyərində səhm geri alışı planlaşdırdığını açıqlayıb.

Oktyabr-dekabr aylarında şirkətin xalis mənfəəti 4,18 milyard avro və ya bir səhmə 0,85 avro təşkil edib. Ötən ilin eyni dövründə isə 1,04 milyard avro və ya bir səhmə 0,21 avro xalis zərər qeydə alınmışdı.

Düzəliş edilmiş xalis mənfəət bir səhmə 0,48 avro olub.

Şirkətin düzəliş edilmiş EBITDA göstəricisi 5,6% artaraq 12,27 milyard avroya, icarə müqavilələri nəzərə alınmaqla EBITDA (EBITDA AL) isə 6,2% artaraq 10,63 milyard avroya çatıb.

Analitiklər EBITDA AL-ın 10,8 milyard avro olacağını təxmin etmişdilər.

"Deutsche Telekom"un dördüncü rübdə gəliri 5,3% artaraq 30,93 milyard avroya yüksəlib. Almaniyada bu göstərici 0,2% azalaraq 6,58 milyard avroya düşüb, Avropanın digər ölkələrində 3% artaraq 3,21 milyard avroya, ABŞ-da isə 7,8% yüksələrək 20,46 milyard avroya çatıb.

2024-cü ilin bütövlüyündə gəlir 3,4% artaraq 115,8 milyard avroya yüksəlib. Bununla yanaşı, xalis mənfəət 37% azalaraq 11,2 milyard avroya enib. Düzəliş edilmiş səhm başına mənfəət isə 19,3% artaraq 1,9 avroya çatıb.

2024-cü ilin yekunlarına əsasən, şirkət bir səhmə 0,9 avro məbləğində rekord səviyyədə dividend ödəməyi planlaşdırır.

"Deutsche Telekom" həmçinin 2025-ci ildə 2 milyard avroya qədər əlavə səhm geri alışı elan edib.

2025-ci ildə şirkət EBITDA AL-ın 44,9 milyard avro, düzəliş edilmiş xalis mənfəətin isə bir səhmə təxminən 2 avro olacağı proqnozunu verib.

Analitiklərin konsensus-proqnozu EBITDA AL-ın 46,9 milyard avroya yüksələcəyini gözləyir.

Son üç ayda "Deutsche Telekom"un kapitallaşması 14,2% artaraq 173,9 milyard avroya çatıb.