Müəllif: Tamara Mustafayeva, Banco.az
Pekin Vaşinqtondan tariflərin tamamilə ləğvini tələb edir.
Banco.az xəbər verir ki, Çin ABŞ-ın tətbiq etdiyi birtərəfli tariflərin tam şəkildə ləğv olunmasını tələb edib və iki ölkə arasında ticarət razılaşması ilə bağlı irəliləyiş iddialarını təkzib edib. Çin Ticarət Nazirliyinin sözçüsü He Yadong bildirib ki, “əgər ABŞ problemi həqiqətən həll etmək istəyirsə, Çin məhsullarına qarşı tətbiq etdiyi bütün birtərəfli tarifləri tamamilə ləğv etməlidir”.
Yadong, ABŞ-Çin danışıqlarında irəliləyiş olduğu ilə bağlı xəbərlərin əsassız olduğunu vurğulayaraq, Vaşinqtonun razılaşma istədiyini göstərmək üçün daha səmimi davranmalı olduğunu deyib.
Bu açıqlama, Donald Trampın Çin tariflərini azaltma ehtimalı ilə bağlı son bəyanatlarının Pekin tərəfindən qeyri-kafi və qeyri-ciddi qəbul edildiyini göstərir. Tramp, Çinlə “aktiv ünsiyyət” olduğunu bildirsə də, Pekin bu sözləri gərginliyi azaltmaq üçün kifayətli hesab etmir.
Çin tərəfi əlavə olaraq Tayvan məsələsində də ABŞ-dan konkret cavab gözləyir. Pekin bu məsələni daxili iş hesab edir və lazım gəldikdə güc tətbiq etmə hüququnu saxlayır.
Bizi sosial şəbəkələrdən izləyin!!
