Azərbaycanda 2009-cu ildən fəaliyyətə başlamış Azərbaycan Mühasiblər və Risk Peşəkarları Assosiasiyası (ARPA) ölkəmizdə maliyyə və idarəetmə sahəsində peşəkar kadrların hazırlanması məqsədilə bu istiqamətdə müxtəlif yerli və beynəlxalq tərəfdaşlıqlar qurmaqda davam edir. Əsas fəaliyyət istiqamətlərindən biri ölkəmizdə sığorta sahəsində peşəkarların hazırlanması olan Assosiasiya bu məqsədlə 2012-ci ildə CII (The Chartered Insurance Institute) ilə rəsmi tərəfdaşlığa başlamış, CII-ın lisenziyalı regional imtahan mərkəzi kimi təsdiq edilmiş və CII-ın regional səviyyədə təlim və imtahan keçirmək səlahiyyətini almışdır.
1912-ci ildə təsis edilmiş CII sığorta sahəsində peşəkarların yetişdirilməsi, müvafiq sertifikasiya proqramının təşkili və tədris materiallarının hazırlanmasında 100 ildən artıq təcrübəyə sahibdir. Hazırda dünyanın 150 ölkəsində 125.000-dən çox üzvü olan CII bu sahədə ən qabaqcıl və peşəkar qurumdur. Dünya üzrə ümumilikdə 1 milyondan çox şəxsin sahib olduğu CII beynəlxalq sertifikasiyası bütün dünya üzrə qəbul edilən qlobal standartdır.
CII sertifikasiya proqramı bu sahədə peşəkar karyera qurmaq istəyən şəxslər üçün ən düzgün seçimdir. Belə ki, CII sertifikasiya proqramının imtahanına hazırlaşarkən sığorta sahəsində əldə edilən dərin biliklər səmərəli iş performansını təmin edir. Həmçinin əldə edilmiş CII sertifikatı dayanıqlı və inkişafa meylli karyera imkanlarına yol açır. CII sertifikasiya proqramının bu kimi əhəmiyyətləri ilə yanaşı, CII sertifikatı sığorta sahəsində “CII Advanced Diploma in Insurance” və “Chartered” statusunun əldə edilməsində ilk addım rolunu oynayır.
Qeyd edək ki, Azərbaycan Mühasiblər və Risk Peşəkarları Assosiasiyası 2014-cü ildən etibarən CII-ın tədris materialları əsasında Azərbaycanda sığorta sahəsində yerli dildə ilk sertifikasiya proqramı – Peşəkar Sığortaçı Sertifikasiyasını (PSS) hazırlamışdır. Bu məqsədlə CII-a məxsus olan “Insurance: principles and practice” dərsliyi tərcümə və nəşr edilərək oxucuların ixtiyarına verilmişdir.
Bizi sosial şəbəkələrdən izləyin!!
