Müştəri sayının bir milyonu ötməsi sadəcə bir rəqəm deyil, bu, müştərilər tərəfindən göstərilən etimadın, peşəkar xidmətin və strateji baxışın sübutudur. Şirkətin bu uğura necə nail olduğu, müştəriləri hansı imkanların gözlədiyi barədə Unicapital-ın Baş direktoru Vüqar Namazovla danışdıq.
- Vüqar bəy, öncə, bu böyük nailiyyətlə sizi təbrik edirik. Müştəri etimadı istənilən şirkət üçün vacibdir, xüsusilə də investisiya sahəsində. Bu nəticəyə nail olmaq üçün hansı addımlar və qərarlar əsas rol oynadı?
Təşəkkür edirəm. Artıq uzun müddətdir ki, Unicapital hər kəsə əlçatan və innovativ investisiya məhsullarını təqdim etməyi məqsədli şəkildə ön planda tutur. Şirkətimizin texnoloji inkişafı nəticəsində dünyanın 20-dən çox birjası ilə inteqrasiya layihələrini həyata keçirtdik. Həmçinin qeyd edim ki, 2024-cü ildə Unicapital, ölkəmizdə bir ilkə imza ataraq, Bakı Fond Birjası ilə inteqrasiyasını uğurla başa çatdırdı. Müştəri məmnuniyyətinin prioritet olduğunu düşünərək, şirkətimizin təqdim etdiyi investisiya tətbiqlərini daima inkişaf etdirib, istifadəçilərə daha rahat və çevik xidmət göstərməyi bacardıq. Bizi bazarda fərqləndirən də məhz bu yanaşmalardır.
- Son illər investisiya sektorunun qarşısında kifayət qədər böyük çağırışlar mövcud idi. Fikrinizcə, bu dəyişikliklər bazarın dinamikasına necə təsir etdi?
Son illərdə bazar şəraitində baş verən dəyişikliklər və makroiqtisadi dalğalanmalar investor davranışlarında əhəmiyyətli dəyişikliklərə səbəb olmuşdur. Bu isə investisiya sahəsində yenilikçi yanaşmaların tətbiqini zəruri etmişdir. Unicapital olaraq, biz Azərbaycan kapital bazarında ilk dəfə investorlara bank tətbiqi vasitəsilə yatırım imkanı təqdim etdik. Hal-hazırda şirkətimiz bu istiqamətdə öz fəaliyyətini genişləndirməkdədir və qeyd edilən yöndə strateji planlar hazırlamışdır. Belə bir mühit, bazarda daha çevik, texnoloji cəhətdən qabaqcıl platformaların inkişafı üçün güclü təkan yaradır.
- Bəs bu tendensiyalarla ayaqlaşmaq üçün Unicapital hazırda hansı transformasiyaları həyata keçirir?
Biz texnoloji transformasiyanı strateji prioritetlərimizdən biri kimi müəyyən etmişik. Şirkət İT infrastrukturuna investisiya etməyə davam edərək sistemlərin etibarlılığını və dayanıqlığını artırır, “IaaS” (Investment as a Service) bazarında aktiv şəkildə genişlənərək tərəfdaşlarına innovativ həllər təqdim edir. Eyni zamanda, “KYC” və müştəri uyğunluğu prosedurlarını təkmilləşdirib tətbiq edərək, şirkətin daxili proseslərini effektiv şəkildə optimallaşdırırıq. Həyata keçirdiyimiz bu təşəbbüslər nəticəsində bazardakı mövqeyimizi daha da möhkəmləndirib, investorlara peşəkar və şəffaf xidmətlər təqdim etməyə davam edirik.
- Bir milyon müştəri – yalnız qürurverici bir məqam deyil, həm də yeni məsuliyyətdir. Yaxın gələcəkdə Unicapital-ın qarşısına qoyulan hədəflər nələrdir?
Bəli, düzgün vurğuladınız, bu bizim üçün çox böyük bir məsuliyyətdir və bu uğurun davamlı inkişafa əsaslanması bizim üçün ən vacib məqamdır. Qarşıdakı dövrdə əsas hədəflərimizdən biri real sektorun maliyyə resurslarına çıxışını genişləndirmək və yerli korporativ qiymətli kağızlar bazarını daha da inkişaf etdirməkdir. Bununla yanaşı, maliyyə inklüzivliyini artıraraq daha çox insanın investisiya imkanlarından yararlanmasını təmin etmək niyyətindəyik. Bu məqsədlə, banklar, startaplar və fintex ekosistemi ilə əməkdaşlığı gücləndirərək, müştərilərimizə innovativ və çevik maliyyə həlləri təqdim etməyə davam edəcəyik. Eyni zamanda, “ESG” prinsiplərinə uyğun strategiyalar tətbiq edərək, dayanıqlı investisiya mühitinin formalaşdırılmasına töhfə vermək bizim əsas prioritetlərimizdən biridir.
