Azərbaycan Respublikası dünyanın nüfuzlu inkişaf bankları və fondları, həmçinin müxtəlif beynəlxalq maliyyə-kredit təşkilatları ilə 2018-ci il 1 yanvar tarixinə respublikamızın sosial-iqtisadi inkişafı üçün vacib əhəmiyyət kəsb edən sahələr üzrə 160 layihə və proqramın maliyyələşdirilməsinə dair dövlət zəmanəti əsasında 194 kredit sazişi imzalayıb. Bunlardan 113 layihə və 7 proqramın icrası başa çatıb, 40 layihəni icrası davam etdirilir.
Bu, Nazirlər Kabinetinin 2017-ci ildə fəaliyyəti haqqında hesabatda əksini tapıb.
Hesabata əsasən, əməkdaşlıq olunan müxtəlif beynəlxalq maliyyə-kredit qurumları ilə 2018-ci il 1 yanvar tarixinə dövlət zəmanəti əsasında bilavasitə hökumətə verilən və dövlət büdcəsində vəsaiti hesabına xidmət edilən ümumi məbləği 13,919 mlrd. dollar ekvivalentində kredit sazişi imzalanıb. İmzalanmış sazişlər üzrə ayrılan kreditlərdən, ümumilikdə 11 mlrd. 518,7 mln. dolları (82,6%), o cümlədən 2017-ci il ərzində 2 mlrd. 908,9 mln. dollar ekvivalentində vəsait istifadə edilib. 2018-ci il 1 yanvar tarixinə istifadə edilmiş kreditlər üzrə təqribən 2 mlrd. 676,9 mln. dollar məbləğində əsas borc qaytarılıb. Dövlət zəmanəti verilmiş xarici borcun qalıq məbləği borcalan təşkilatların təqdim etdi hesabat məlumatlarına əsasən 2018-ci il 1 yanvar tarixinə 9 mlrd. 398,3 mln. dollar ekvivalentində olub.
“Xarici dövlət borcunun 5 mlrd. 510,4 mln. dolları və ya 58,6%-i hökumət tərəfindən birbaşa cəlb edilmiş kreditlər, 3 mlrd. 331,4 mln. dolları və ya 35,5%-i xarici valyuta nominallı dövlət qiymətli kağızları, 556,5 mln. dolları və ya 5,9%-i isə xarici dövlət borcu hesab edilən şərti öhdəliklərdən ibarətdir. 2017-ci il ərzində xarici dövlət borcuna xidmətlə əlaqədar dövlət büdcəsi vəsaiti hesabına 855,9 mln. dollar məbləğində ödənişlər həyata keçirilib. Bu ödənişlərin 668,7 mln. dolları əsas borc kimi, 187,2 mln. Dolları isə kreditlərə hesablanmış faizlərə görə həyata keçirilən ödənişlərdir,” – deyə hesabatda qeyd olunub.
Apa.az
