Müəllif:Ayşən İmanova/Banco.az

"Dell" uzaqdan və hibrid iş siyasətinə son qoyan texnologiya nəhənglərinin sırasına qoşulub. 3 mart 2025-ci il tarixindən etibarən şirkət ofisindən bir saatlıq məsafədə yaşayan bütün "Dell" işçilərindən həftənin beş günü ofisdə işləmək tələb olunacaq.

Banco.az xəbər verir ki, bu barədə “The Verge” məlumat yayıb.

Baş direktor Maykl Dell bir elektron məktubda hibrid siyasətin sona çatdığını elan edərək, "Dell" ofisinin yaxınlığında yaşayan bütün hibrid və uzaq işçilərin həftənin beş günü ofisdən işləyəcəklərini bildirib.

Dell bu qərarını birbaşa ünsiyyətin vacibliyini vurğulamaqla izah edib:

"Biz müşahidə etdik ki, bütün mövcud texnologiyalara baxmayaraq, heç bir şey insanların qarşılıqlı əlaqə sürəti ilə müqayisə oluna bilməz. 30 saniyəlik söhbət saatlarla, hətta günlərlə davam edən e-poçt yazışmalarını əvəz edə bilər".

Bu məcburi tələbə baxmayaraq, "Dell" çevikliyin üstünlüklərini, azaldılmış gediş-gəliş vaxtını və işçilər üçün xərclərə qənaət, həmçinin genişləndirilmiş istedad fondunu, azaldılmış əlavə xərcləri və işəgötürənlər üçün məhsuldarlığı əsas gətirərək uzaqdan iş həlləri satmağa davam edir.

Qeyd edək ki, “Dell” bundan əvvəl satış, istehsal və mühəndislik laboratoriyalarından işçilərini ofisə qaytarmışdı.

"Dell" son aylarda ofisə məcburi geri qaytarma tətbiq edən yeganə şirkət deyil. AT&T, "Amazon", "Stellantis" və "JP Morgan" da bu ay oxşar siyasətlərə başlayıb və ya elan edib.