Müəllif: Tamara Mustafayeva, Banco.az
ABŞ-lı polad istehsalçısı “Cleveland-Cliffs Inc.” metal istehsalında mövcudluğunu gücləndirmək məqsədilə potensial nadir torpaq elementi mənbələrini araşdırdığını bəyan edib.
Banco.az xəbər verir ki, şirkətin baş direktoru Lourenso Gonçalves bazar ertəsi üçüncü rübün maliyyə hesabatını təqdim edərkən bildirib:
“Nadir torpaq elementlərinin əhəmiyyət qazanması bizi mədən aktivlərindəki bu potensialı dəyərləndirməyə yönəltdi.”
Hazırda bir çox texnoloji məhsulun istehsalında mühüm rol oynayan nadir torpaq elementləri ABŞ ilə Çin arasındakı ticarət gərginliyində strateji bir dönüş nöqtəsinə çevrilib. Çin bu materialların hasilatı və emalında qlobal lider mövqeyindədir və son dövrlərdə ixracı məhdudlaşdırması Tramp administrasiyasını alternativ təchizatçılar axtarmağa və yerli istehsalı artırmağa sövq edib.
“Cleveland-Cliffs” Miçiqan və Minnesota ştatlarında yerləşən iki mədən sahəsində nadir torpaq elementlərinə dair “minerallaşmanın əsas göstəriciləri”nin aşkarlandığını açıqlayıb.
Bizi sosial şəbəkələrdən izləyin!!
