Müəllif: Tamara Mustafayeva, Banco.az
ABŞ-da endirimli satışlar günü olan "Qara Cümə"də onlayn xərclər 11,8 milyard dollara çatıb.
Banco.az xəbər verir ki, “Adobe Analytics”in məlumatlarına görə, ölkədə məhdud müddətli endirimli satışların keçirildiyi Qara Cümə günündə onlayn satışlar artıb.
Həmin gün istehlakçılar onlayn olaraq 11,8 milyard dollarlıq rekord həcmdə alış-veriş ediblər.
Bu gündə edilən xərclərin məbləği ötən illə müqayisədə 9% artım göstərib.
ABŞ-da Qara Cümədən bir gün əvvəl qeyd olunan Şükran Günündə də onlayn alış-verişlərin həcmi 6,4 milyard dollara çatıb.
Süni intellekt dəstəyi ilə həyata keçirilən e-ticarət trafiki isə bu il keçən illə müqayisədə 805% artıb.
Mastercard SpendingPulse məlumatlarına görə, Qara Cümə günündə pərakəndə satışlar bu il ötən illə müqayisədə 4,1% artıb.
ABŞ-da noyabr ayının dördüncü cümə axşamı qeyd olunan Şükran Günü (Thanksgiving Day) ilə başlayan və bütün ölkə üzrə endirim kampaniyalarının yayıldığı Qara Cümə (Black Friday), kiçik bizneslərin satışlarını artırmağı hədəfləyən Kiçik Biznes Şənbəsi (Small Business Saturday) və Kiber Bazar ertəsi (Cyber Monday) ilə davam edən, daha sonra isə Milad və 31 Dekabrdakı Yeni İl Gecəsi ilə başa çatan dövr pərakəndə sektoru üçün böyük əhəmiyyət daşıyır.
Ölkədə “bayram mövsümü” adlandırılan bu dövr böyük pərakəndə şirkətləri üçün adətən ilin ən gəlirli vaxtı hesab edilir və amerikalı istehlakçıların iqtisadi durumunun mühüm göstəricisi kimi qiymətləndirilir.
ABŞ Milli Pərakəndə Satıcılar Assosiasiyasının proqnozlarına görə, ölkədə “bayram mövsümü” satışlarının bu il ilk dəfə olaraq 1 trilyon dolları keçəcəyi gözlənilir.
Bizi sosial şəbəkələrdən izləyin!!
