Mərkəzi Bankda ənənəvi olaraq “Qlobal Pul Həftəsi” çərçivəsində silsilə tədbirlər həyata keçirilmişdir. Belə ki, 2017-ci il “Qlobal Pul Həftəsi” ərzində iqtisadi maarifləndirmə tədbirləri çərçivəsində uşaq bağçaları və məktəblilər, gənclər və orta məktəb müəllimləri üçün müxtəlif tədbirlər təşkil edilmişdir. Bu tədbirlərə bağça və məktəblərə səfərlər, “Yığım” oyunları, universitet tələbələri üçün “Maliyyə savadlılığı: Peşəkar karyeraya aparan yol” adlı müsabiqə xarakterli təlimlər, “Həyat Bilgisi” fənnini tədris edən orta məktəb müəllimlərinə seminarlar və Facebook səhifəsində həştəq müsabiqəsi daxil olmuşdur.
Məktəbəqədər və ümumi təhsil müəssisələrində uşaqlara pul nişanları, onların tarixi, gündəlik həyatımızda pulun önəmi və cib xərcliklərindən səmərəli istifadə yolları və gələcək ehtiyaclar üçün yığımla bağlı faydalı məlumatlar verilmişdir. Eyni zamanda, ümumtəhsil məktəblərində “Həyat Bilgisi” fənnini tədris edən müəllimlər üçün Təhsil İşçilərinin Peşəkar İnkişafı İnstitutunda “Maliyyə savadlılığının ünsürlərindən təhsildə istifadə” mövzusunda seminarlar keçirilmişdir.
Həmçinin “Qlobal Pul Həftəsi” çərçivəsində tələbə və gənclər arasında məhşurluq qazanan və onların böyük marağına səbəb olan “Yığım” oyunları və “Maliyyə savadlılığı: Peşəkar karyeraya aparan yol” adlı müsabiqə xarakterli təlimlər keçirilmişdir. Tələbələr üçün sözügedən təlimlərin keçirilməsi Mərkəzi Bankda artıq ənənə halını almışdır və onların maraqları nəzərə alınaraq, hər il maliyyə qurumları ilə birgə çoxsaylı belə seminarlar təşkil edilir.
Əlavə olaraq, “Qlobal Pul Həftəsi” ərzində Facebook səhifəsində həştəq müsabiqəsi elan edilmişdir. Yarışmanın başlıca tələbi maliyyə savadlılığına dair şəxsi qeydlərin #GMWAzerbaijan2017 həştəqi (sosial şəbəkələrdə məlumatların axtarışı üzrə açar sözün etiketlənməsi) ilə Facebook səhifəsində yerləşdirmək idi. Ən çox bəyənilmiş və yaradıcı qeydlərin müəllifləri qalib olaraq seçilmiş, Mərkəzi Banka dəvət edilmiş və 100 manat məbləğində mükafatla təltif edilmişlər.
Cari ildə 130-dan artıq ölkədə qeyd olunan “Qlobal Pul Həftəsi” 27 mart – 2 aprel tarixlərinə təsadüf etmişdir.
