Müəllif - Fərid İslamov - Banco.az
Tayvanın Taiwan Semiconductor Manufacturing Co. (TSMC) şirkəti önümüzdəki dörd il ərzində ABŞ-da çip istehsalı müəssisələrinə 100 milyard dollar investisiya qoymağı planlaşdırır. Bu barədə The Wall Street Journal qəzeti məlumatlı mənbələrə istinadən yazıb.
Mənbələrin bildirdiyinə görə, bu plan ABŞ prezidenti Donald Tramp tərəfindən bazar ertəsi günü daha sonra elan ediləcək.
Vəsaitlər yarımkeçirici komponentlərin istehsalı üçün müasir müəssisələrin tikintisinə yönəldiləcək, WSJ qeyd edir.
Sifarişlə çip istehsalında dünya lideri olan TSMC ilk dəfə 2020-ci ildə ABŞ-da (Arizona ştatında) 12 milyard dollar dəyərində zavod tikmək niyyətini açıqlamışdı. Daha sonra şirkət bu istehsal sahəsini genişləndirmək qərarına gələrək ümumi məbləği 65 milyard dollar olan investisiya vədi vermişdi. TSMC-nin ABŞ-dakı müəssisəsində çiplərin kütləvi istehsalı keçən ilin sonunda başlayıb.
Tayvan şirkəti 2022-ci ildə ABŞ-da qəbul edilmiş Chips Act qanunu çərçivəsində yardım alıb. Bu qanun ölkədə yarımkeçirici komponentlərin istehsalını dəstəkləməyi nəzərdə tutur.
Tramp dəfələrlə çip istehsalçılarını ABŞ-da müəssisələr tikməyə çağırıb, lakin o, Chips Act-ı tənqid edərək şirkətləri cəlb etməyin daha təsirli yolunun idxal gömrük rüsumlarını artırmaq olduğunu bildirib. Ötən ay o, çip idxalına 25% gömrük rüsumu tətbiq etməyi planlaşdırdığını açıqlayıb.
