Müəllif:Ayşən İmanova/Banco.az
Fransa Senatı 2025-ci il üçün büdcəni təsdiq edərək Konstitusiya Şurasına göndərib.
Banco.az xəbər verir ki, şuranın təsdiqindən sonra prezident Emmanuel Makron qanun layihəsini imzalaya biləcək.
Büdcə 2025-ci ildə kəsirin 5,4 %-ə qədər azaldılmasını nəzərdə tutur. Bu da dövlət xərclərinin azaldılması və zəngin vətəndaşlar, eləcə də korporasiyalar üçün vergilərin artırılması hesabına əldə ediləcək. Eyni zamanda, büdcədə hərbi xərclərin 2024-cü illə müqayisədə 3,3 milyard avro artırılması nəzərdə tutulur.
Agentlik qeyd edib ki, baş nazir Fransua Bayru xüsusi konstitusiya səlahiyyətlərindən istifadə edərək qanun layihəsini irəli sürüb. Çünki onun sələfi 2024-cü ildə qanun layihəsinin qəbul edilməsinə nail ola bilməyib. Bu, müxtəlif siyasi qüvvələrlə çoxhəftəlik müzakirələr fonunda baş verib.
Qanun layihəsinin lehinə 219, əleyhinə 107 senator səs verib. Beləliklə, qanun layihəsi qəbul edilmiş hesab olunur.
