Müəllif:Gülbəniz Hüseynli/Banco.az
Müasir biznes mühitində məhsulun yalnız istehsal edilməsi kifayət deyil, onun bazara düzgün şəkildə təqdim olunması və istehlakçılara çatdırılması da böyük əhəmiyyət daşıyır.
Trade marketinq bu prosesin ən vacib elementlərindən biridir və istehsalçılarla pərakəndə satış nöqtələri arasında əlaqəni gücləndirmək üçün istifadə olunur.
Banco.az xəbər verir ki, bu strategiya, məhsulun mağazalarda daha yaxşı görünməsi, müştərilərin diqqətini cəlb etməsi və nəticədə satışların artmasını təmin etməyə yönəlib. Trade marketinqin əsas məqsədi, istehlakçının alış qərarına təsir edəcək effektiv satış və reklam mexanizmlərini tətbiq etməkdir. Bu yanaşma xüsusilə FMCG (tez istehlak olunan mallar) sektorunda geniş istifadə olunur və marketlərdə, mağazalarda məhsulların tanıtımı üçün vacib rol oynayır.
Trade marketinqin əsas məqsədlərinə aşağıdakılar daxildir:
Satışları artırmaq – Mağazalarda məhsulların daha yaxşı görünməsi və alıcıları cəlb etməsi üçün tədbirlər görülür.
Brendin mağaza daxilində tanınmasını artırmaq – Məhsulun rəfdəki mövqeyini yaxşılaşdırmaq və daha çox istehlakçının diqqətini çəkmək.
Distribyutor və pərakəndəçilərlə əməkdaşlığı gücləndirmək – Satış nöqtələri ilə effektiv münasibətlər quraraq məhsulun mövcudluğunu artırmaq.
Məhsulun rəqabət üstünlüyünü təmin etmək – Rəqib məhsullara qarşı daha əlverişli mövqe tutmaq.
Marketoloqların qənaətinə görə, ümumilikdə, trade marketinq istehsalçıların və pərakəndə satış nöqtələrinin satışları artırmaq və istehlakçıların diqqətini cəlb etmək üçün istifadə etdiyi effektiv bir marketinq yanaşmasıdır. Bu strategiya düzgün tətbiq edildikdə, brendlərin mağazalarda daha görünən olmasına, satış nöqtələrində müştəri axınının artmasına və nəticədə daha yüksək gəlir əldə olunmasına kömək edir.
Məhsulun rəqabət bazarında uğurlu olması üçün trade marketinq kampaniyaları, promosiyalar, merçendayzinq və POSM kimi alətlərdən səmərəli şəkildə istifadə olunmalıdır. Beləliklə, bu yanaşma həm istehlakçıların seçimlərinə təsir edir, həm də istehsalçılar və satıcılar arasında uzunmüddətli əməkdaşlığın qurulmasına töhfə verir. Bu səbəbdən, hər bir şirkət bazarda mövqeyini gücləndirmək və satışlarını artırmaq üçün trade marketinq strategiyalarını düzgün planlaşdırmalı və həyata keçirməlidir.
