Beynəlxalq Hava Nəqliyyatı Assosiasiyasının (IATA) rəsmi məlumatlarına əsasən mütəmadi olaraq elan edilən və dünyanın ən güclü pasportlarını sıralayan “Henley & Partners” şirkəti tərəfindən “Pasport İndeksi 2025” nəşr olunub. 

227 istiqamətin qiymətləndirildiyi hesabatda 2025-ci ilin ən güclü pasportu 195 ölkəyə vizasız girişi təmin edə bilən Sinqapur olub. Yaponiya 193 xalla ikinci yerdədir. 192 ölkəyə vizasız giriş icazəsi verən Fransa , Almaniya, İtaliya və İspaniya kimi Avropa ölkələr də ön sıradadır.  Bu ölkələr Finlandiya və Cənubi Koreya ilə də 3-cü yeri bölüşdürüblər.

Avstriya, Danimarka, İrlandiya, Lüksemburq, Hollandiya, Norveç və İsveç kimi bir qrup Avropa İttifaqı ölkəsi 191 istiqamətə vizasız giriş imkanı ilə 4-cü yerdə qərarlaşıb. Belçika, Yeni Zelandiya, Portuqaliya, İsveçrə və Böyük Britaniya 190 istiqamətlə 5-ci yerdə qərarlaşıb. ABŞ bir pillə itirərək 9-cu yerə endiyi halda, Kanada 7-ci yerdə qərarlaşıb. Birləşmiş Ərəb Əmirlikləri (BƏƏ) 185 istiqamətə vizasız giriş təmin edərək 10-cu yerdə qərarlaşıb. 2015-ci ildən bəri daha 72 istiqamətə çıxış əldə edən BƏƏ ilk 10-luğa daxil olan yeganə ərəb dövlətidir.