Müəllif:Ayşən İmanova/Banco.az
ABŞ Nəqliyyat Nazirliyi Almaniyanın “Lufthansa” aviaşirkətini yəhudi əsilli sərnişinləri təyyarəyə mindirmədiyinə görə 4 milyon dollar cərimələyib.
Banco.az xəbər verir ki, bu barədə qurumun bəyanatında deyilir.
Nazirlik qeyd edir ki, 2022-ci ilin may ayında Frankfurt-Maynda eniş etməklə Nyu Yorkdan Budapeştə olan uçuşla bağlı 40-dan çox şikayət olub.
Araşdırma zamanı müəyyən edilib ki, ekipajın tələblərini yerinə yetirməyən bir neçə nəfərin özünü lazımi qaydada aparmaması ucbatından Almaniya hava limanında 128 sərnişinin reysə minməsinə icazə verilməyib.
Quruma şikayət edənlər “Lufthansa”nın ənənəvi ortodoksal yəhudi paltarı geyinmiş bütün səyahətçiləri eyni qrup hesab etdiyini, əslində isə onların əksəriyyətinin bir-birini tanımadığını bildiriblər. Yekunda aviaşirkət onların heç birinə Budapeştə uçan təyyarəyə minmək icazəsi verməyib.
Nazirlikdən qeyd olunub ki, bu, qurumun indiyədək ayrı-seçkiliyə görə tətbiq etdiyi ən böyük cərimədir.
